Rza Rzayev
YALQUZAQ
İki qurd itirib tayın
İki seçim var:
ya yenidən sürüyə qoşulmaq,
ya yalqız qalmaq.
İki eyni təbiət,
Fərqli xarakter,
Fərqli yaşam tərzi
seçmək
Biri qoşulur sürüyə
Olur canavar.
Biri qalxır ən uca zirvəyə
Seçir yalqızlığı,
Tapınır tək Tanrıya,
Olur yalquzaq.
Canavar
Sıradan biridir artıq
İtirib adı.
Yalquzaq gözləyir
axşamı
Fərqi yoxdur ona
Canavar sürüsü,
Qoyun sürüsü,
İnsan sürüsü
Vuracaq özünü sürüyə
Bir tək can qalmasın deyə.
O, nifrət edir sürüyə
Sürü təbiəti
Xəyanət yaradır deyə.
O sevmir xəyanət edənləri
Sənə çatmaq istəyirəm
Səsini sevdim,
sözünə baxmadım.
Baxışlarını sevdim,
gözünə baxmadım.
Tanrı seçdi,
ölüm sənə çatdı,
mən çatmadım.
Ölüm yaşa baxmadı.
Yumdu gözlərini
baxışların mənə çatmadı.
Göz yaşlarım
sənə çatdı,
çatmadı?
Göz yaşlarımda batdı
ölüm.