Türkmənistanın Marı şəhərində təntənəli mərasim keçirilib

Fikrət Babayev: “Bu layihə türk xalqlarının birləşməsinə, bir-birinin zəngin mədəniyyəti ilə tanış olmasına imkan yaradır”

Artıq dördüncü ildir ki, TÜRKSOY-un “Türk dünyasının mədəniyyət paytaxtı” layihəsi davam edir. 2012-ci ildən həyata keçirilən layihə üzrə ötən müddətdə Astana (Qazaxıstan), Əskişəhər (Türkiyə) və Kazan (Tatarıstan) bu missiyanı yerinə yetirib. 2015-ci ildə Türkmənistanın Marı (keçmiş Mərv) şəhəri "Türk dünyasının mədəniyyət paytaxtı” estafetini qəbul edib.

Bu münasibətlə yanvarın 27-də Marı şəhərində təntənəli mərasim və şənliklər keçirilib. “Türk dünyasının mədəni paytaxtı - 2015” ilinin açılış mərasimində TÜRKSOY-un baş katibi Düsen Kaseinov, türkdilli ölkələrin, türk toplumlarının nümayəndə heyətləri iştirak ediblər. Tədbirlərdə ölkəmizi Mədəniyyət və Turizm Nazirliyi Mədəniyyət müəssisələri və xalq yaradıcılığı şöbəsinin müdiri Fikrət Babayevin rəhbərliyi ilə nümayəndə heyəti təmsil edib. Heyətdə “Cəngi” estrada-folklor ansamblı, xalq tətbiqi sənəti ustaları Pərvanə Eyyubova və Nahid Vahabov yer alıblar.
Səfər təəssüratını bizimlə bölüşən Fikrət Babayev əvvəlcə Marı şəhərinin türk dünyası üçün tarixi əhəmiyyətini diqqətə çatdırdı: “Bu şəhər türk dünyasının mədəni mərkəzlərindən biri olub. Burada orta əsrlərə aid abidələr və onların izləri qalmaqdadır. Bu gün də Marı şəhəri inkişaf etməkdədir. Çox gözəl infrastruktur yaradılıb, muzeylər, kitabxanalar, mədəniyyət sarayları fəaliyyət göstərir. 2015-ci ildə şəhərin “Türk dünyasının mədəniyyət paytaxtı” elan olunması onun daha da tanınmasına, tarixi-mədəni irsinin təbliğinə zəmin yaradacaq. Ümumiyyətlə, bu layihə türk xalqlarının birləşməsinə, bir-birinin zəngin mədəniyyəti ilə tanış olmasına imkan verən gözəl bir təşəbbüsdür”.
Həmsöhbətim bildirdi ki, şəhərdə təşkil olunan tədbirlər maraqlı məqamlarla yadda qalıb: “Ruhiyyət Sarayı qarşısındakı meydanda teatr artistlərinin və yaradıcı kollektivlərin iştirakı ilə Marı şəhərinin şanlı tarixinə həsr edilmiş musiqili-ədəbi tamaşa göstərildi. Mərasimə Türkmənistan Prezidenti Qurbanqulu Berdiməhəmmədov, ölkə parlamentinin deputatları, hökumət nümayəndələri, alimlər, mədəniyyət və incəsənət xadimləri, tələbə-gənclər toplaşmışdı. Tədbirdə Azərbaycan, Türkiyə, Qazaxıstan, Qırğızıstan, Makedoniya, Bosniya və Herseqovina, Macarıstan, Bolqarıstan, habelə Rusiya Federasiyasının federal subyektləri - Tatarıstan, Başqırdıstan, Xakasiya, Tuva, Saxa-Yakutiya, Kalmıkiya, Altay diyarı, Moldovanın Qaqauz yeri muxtar bölgəsinin nümayəndə heyətləri iştirak edirdi”.
* * *
Tədbirdə Türkmənistan Prezidenti Qurbanqulu Berdiməhəmmədovun iştirakçılara təbrik müraciəti oxunub. Müraciətdə qədim Marı şəhərinin ümumbəşəri sivilizasiya tarixində xüsusi əhəmiyyəti vurğulanıb. Türkmən xalqının zəngin tarixi, nadir mədəni və mənəvi dəyərlərindən söz açan dövlət başçısı əmin olduğunu bildirib ki, “Marı - Türk dünyasının mədəniyyət paytaxtı - 2015” ilində keçiriləcək tədbirlər xalqların və mədəniyyətlərin qarşılıqlı yaxınlaşmasına və zənginləşməsinə xidmət edəcək.
TÜRSOY-un baş katibi Düsen Kaseinov türk xalqlarının mədəniyyətinin və incəsənətinin qorunub saxlanmasına və inkişafına şərait yaradan dövlətlərarası konstruktiv əlaqələrə verdiyi dəstəyə görə Türkmənistan Prezidentinə dərin minnətdarlığını bildirib. O deyib: “Türk dünyasının mədəniyyət paytaxtı” layihəsi çərçivəsində fəxri estafeti UNESCO-nun Dünya İrs Siyahısına daxil edilmiş qədim Mərv - indiki Marı şəhəri qəbul edib. Bu unikal irs Marı şəhərini türk dünyasının mədəni mərkəzi hesab etməyə əsas verir”.
Sonra tədbirin bədii hissəsinə start verilib. Fikrət Babayev bildirdi ki, Ruhiyyət Sarayında keçirilən bayram konsertində Azərbaycanın “Cəngi” estrada-folklor ansamblı, habelə Əskişəhərin (Türkiyə) folklor ansamblı, Qazaxıstanın “Ak jayın” musiqi kollektivi çıxış edib. “Cəngi” ansamblının çıxışı, ifa olunan rəqslər alqışlarla qarşılanıb.
“Mukam” skripkaçılar ansamblının ifasında türk xalqlarının musiqisindən ibarət popurri də qonaqlar üçün xoh hədiyyə olub. Bayram şənliyinin sonunda türkmən xalqının milli mədəniyyətinin harmoniyasının və mənəvi gücünün rəmzi sayılan “Kuştdepdi” adlı qədim rəqs ifa olunub.
Marı şəhərinin “Türk dünyasının mədəniyyət paytaxtı” statusu çərçivəsində keçirilmiş ilk tədbirlərdən biri də təsviri, dekorativ-tətbiqi sənət nümunələrinin və foto əsərlərinin beynəlxalq sərgisi olub. Marı Vilayəti Tarix-Diyarşünaslıq Muzeyində keçirilən açılış mərasimində çoxsaylı qonaqlar, habelə şəhər ictimaiyyətinin nümayəndələri iştirak edib. Ekspozisiyada Azərbaycan, Türkiyə, Makedoniya və Türkmənistan rəssamlarının, keramika və foto ustalarının işləri nümayiş etdirilib. Rəsm və fotolarda maraqlı peyzajlar, tarixi şəxsiyyətlərin və müasirlərimizin obrazları əks olunub.
Tədbirlərə Makedoniya, Bosniya və Herseqovina, Macarıstan, Bolqarıstan kimi ölkələrdən nümayəndələrin də qatılmasının əlamətdar fakt olduğunu deyən şöbə müdiri əlavə etdi ki, TÜRKSOY çərçivəsində beynəlxalq əməkdaşlıq təkcə bu təşkilatın üzvü olan ölkələri deyil, başqa dövlətləri və xalqları da əhatə edir.

* * *
Nümayəndə heyətləri şəhərin tarixi məkanları, abidələri ilə tanış olublar, “Qədim Mərv” Dövlət Tarix-Mədəniyyət Qoruğuna baş çəkiblər. Sultan Səncərin məqbərəsi, Xoca Yusif Həmədani məscidi, qədim Ərk qalası və Qız qalası ilə tanışlıq onlarda zəngin təəssürat yaradıb.