- 18-06-2009
- 1187
Rusiya imperatriçəsi I Yelizavetanın (Petrovna) tacqoyma albomu «Christies» auksionunda 98,5 min dollara - ilkin qiymətindən təxminən 3 dəfə baha satılıb. Bu barədə auksion evinin rəsmi İnternet saytında bildirilir.Albom «İmperatriçə Yelizaveta Petrovnanın Moskvaya sağ-salamat daxil olması və müqəddəs tac qoyulması mərasiminin ətraflı təsviri» adlanır. Kitabda Qriqori Kaçalov və İvan Sokolov tərəfindən işlənən 49 qravüra var. Kitab XVIII - XIX əsrlər rus nəşrləri arasında ən dəbdəbəlilərdən biri sayılır. Albom ilk dəfə 1744-cü ildə 600 nüsxə ilə çap edilib. Sonradan isə kitabın daha 950 nüsxəsi çapdan çıxıb. Auksionda satılan nüsxə Pol və Marianna Qurarinin şəxsi kolleksiyasının bir hissəsi olub. I Pyotrun və I Yekaterinanın qızı olan I Yelizaveta 1741-ci ildə saray çevrilişi nəticəsində hakimiyyətə gəlib. İmperatriçənin taxt-taca oturması ilə bağlı təntənəli tədbirlər təxminən 2 ay davam edib və qravüraçılar bu tədbirlərin bir hissəsini əks etdiriblər.
