Tacikistan, Yaponiya, Mərakeş, Moldova və Belarus səfirləri ölkələrinin Yeni ili qarşılama adətləri barədə qəzetimizə danışdılar
      
   Yeni il bayramı dünyanın demək olar ki, əksər ölkələrində qeyd olunur. Sadəcə, fərqli ənənələrlə. Oxşar olan isə odur ki, köhnə il yola salınır, yenisi qarşılanır.
   2011-ci ilin gəlişinə artıq bir neçə gün qalır. Dünya xalqlarını birləşdirən bu bayramın qarşılanma özəlliklərini bu dəfə Azərbaycanda fəaliyyət göstərən xarici ölkə səfirlərindən eşitmək qərarına gəldik.
   
   Tacikistanın ölkəmizdəki səfiri
   Zokir Vəzirov:
   Tacikistanda əsl Yeni il bayramı Novruz hesab olunsa da, yeni təqvim ilinin başlanması da bayram edilir. Eyni zamanda bu bayram tacik xalqının ənənələrinə uyğun formada qeyd edilir. Tacikistanda Şaxta babanı «Bobbi Barfi», Qar qızı isə «Barfak» adlandırırlar. Bunlar uşaqların ən sevimli personajlarındandır. Ölkəmizdə Yeni il tətili yanvar ayının 1-dən 4-ə qədər elan edilir. Tacikistanda Yeni il həm də ailəvi bayram hesab olunur. Məsələn, ailələr süfrələrə müxtəlif, fərqli yeməklər düzər və ailə üzvləri süfrə arxasına toplaşarlar. Ümid edirəm ki, qarşıdan gələn 2011-ci il həm Tacikistan, həm də Azərbaycan xalqı üçün çox uğurlu il olacaq. Bu il ölkələrimiz müstəqilliklərinin 20 illiyini də qeyd edəcək.  

 Yaponiyanın Azərbaycandakı səfiri
   Şusuke Vatanabe:
   Yaponiyada Yeni İl bayramı «şoqatsu» adlanır və yanvarın 1-dən 3-ə qədər qeyd olunur. Yeni ilin ilk günü səhər erkən yaponların çoxu özlərinə və qohumlarına dualar etmək üçün «Sinto» adlanan müqəddəs yerlərə və buddist məbədlərinə baş çəkirlər. Müqəddəs yerlərə baş çəkdikdən sonra insanlar evə qayıdır, süfrələrə müxtəlif yeməklər, içkilər düzürlər, birlikdə yeyib-içərək bayramı qeyd edirlər.
   Yeni İldə yeyilən ənənəvi yeməklərdən biri düyü piroqudur. Bu yeməyin özəl xüsusiyyəti ondan ibarətdir ki, o uzunömürlülüyün simvolu hesab olunur.
   Onu da qeyd edim ki, mən Yeni ili ilk dəfə Azərbaycanda qarşılayacağam. Bilirəm ki, Azərbaycanın qədim tarixi, zəngin mədəniyyəti var. Bu baxımdan xalqınızın Yeni ili necə qeyd etmələrini görmək mənim üçün çox maraqlı olardı. Bütün Azərbaycan xalqına qarşıdan gələn Yeni ildə sevinc, sülh və xoşbəxtlik arzu edirəm.          

   Mərakeşin ölkəmizdəki səfiri
   Hasan Hami:
   Vaxtilə bu bayram bizim ölkəmizdə o qədər də möhtəşəm keçirilmirdi. Amma indi vəziyyət dəyişib. Digər yandan, Mərakeşdə xristianlar da az deyil. Eyni zamanda, Mərakeşə dünyanın hər yerindən turistlər gəlir. Bir sözlə, Yeni il günlərində hotellər, restoranlar insanlarla dolu olur və möhtəşəm bayram keçirilir. İnsanlar küçələrə çıxır, Şam ağacları bəzədilir, süfrələrə çoxlu şirniyyatlar, növbənöv quru meyvələr düzülür. Mərakeşdə keçirilən Yeni il həm də sizin Novruz bayramına bənzəyir. İnsanlar təmizlik işləri görür, təzə paltarlar geyinir və şən olmağa çalışırlar. Yanvar ayı mənim məzuniyyət günlərimə təsadüf etdiyindən Yeni ili öz ölkəmdə - Mərakeşdə qeyd etməyə hazırlaşıram. Bayram münasibətilə Azərbaycan xalqını təbrik edir, onlara gözəl günlər arzu edirəm.    

   Moldovanın Azərbaycandakı səfiri
   İqor Bodiu:
   Yeni il bayramı Moldovada ailə bayramı hesab olunur. Əgər Yeni ili Moldovada keçirsəydim bunu dostlarımızla qeyd edər, bir-birimizə qonaq gedərdik. Amma indi iş fəaliyyətimlə əlaqədar olaraq Azərbaycandayıq. Bayramı da ailəmlə birlikdə burada edəcəyik. Ölkənizdə olduğum az müddətdə Azərbaycan və onun insanları bizə çox doğmalaşıb, özümüzə dostlar qazanmışıq. Bu səbəbdən niyə də bayramı bu şəhərdə keçirməyək? Digər tərəfdən Yeni il bayramı Moldovada da elə Azərbaycanda olduğu kimi keçirilir. Şam ağacı bəzədilir, zəngin süfrə açılır, insanlar bir-birinin evinə qonaq gedirlər. Bir məqamı da xüsusi olaraq vurğulayardım ki, Bakıda havanın yaxşı keçməsi Yeni il günlərində şəhərdə yaxşı gəzmək imkanı da verəcək. Bir sözlə, əminəm ki, Bakıda keçirəcəyimiz bayramdan əla zövq alacağıq». 
  

   Belarusun Azərbaycandakı səfiri
   Nikolay Pastkeviç:
   Artıq bir neçə ildir ki, Yeni ili Bakıda qeyd edirik. 2011-ci ili öz yaxınlarımın ətrafında Bakıda qeyd edəcəyəm. Bir-birimizə uğurlar, xoşbəxt günlər arzu edəcəyik. Geridə qoyduğumuz 2010-cu il çox uğurlu il oldu, gözəl nəticələr əldə etdik. Ümid edək ki, 2011-ci il də belə olacaq.
   Azərbaycan çox qonaqpərvər ölkədir. Burada özümüzü heç də yad ölkədəki kimi hiss etmirik. Təbii ki, Yeni il öncəsi Belarusa evə zəng edib öz doğmalarımı təbrik edəcəm və onlar da məni təbrik edəcəklər. Bu bizdə artıq adi hala çevrilib». 
   
   Mehparə 

   * * *

 Bəs digər ölkələrdə necə?
   
   Yeni il müxtəlif ölkələrdə eyni həvəslə, eyni ruh yüksəkliyi, eyni coşqu ilə, eyni zamanda, özünəməxsus ənənə ilə qarşılanır.
       
   İtaliya
   
   İtaliyada Yeni il axşamı köhnə ev əşyalarının pəncərədən küçəyə atılması ənənəsi hələ də qalmaqdadır. Küçədən keçənlər üçün heç də təhlükəsiz olmayan bu adətə əməl edən italyanlar hesab edir ki, nə qədər çox mebel atsanız, Yeni il öz gəlişi ilə evinizə bir o qədər sərvət gətirə bilər.   

   Fransa
   
   Bir çox Fransa əyalətlərində bu günə qədər köhnə bir ənənəyə əməl olunmaqdadır. Yeni ildə ilk olaraq su dalınca bulağa gedən ev sahibəsi ora qoğal və ya bulka qoyur. Bu bayram payını ertəsi gün o biri sahibə götürür, əvəzində özü gətirdiyini bulaq başında qoyur. Qadınlar axşam olana qədər bir-birilərini bu cür qonaq edirlər.
   
   Almaniya
   
   Elə ki, saatlar gecəyarını vurur, müxtəlif yaş təbəqəsinə aid insanlar masa, stul, kresloya minir və son saat zəngi çalınanda birlikdə Yeni ilə atlanırlar.
   
   İngiltərə
   
   İngiltərədə Yeni ildə ən çox sevinən uşaqlardır. Çünki bütün gecəni küçələrdə ticarətçilər maraqlı oyuncaqlar, maskalar, hava şarları satırlar. Yeni il axşamı ingilislər ənənəvi ağ pudinq yeyirlər. Lakin onlar bunu çox ehtiyatlı edirlər - çünki pudinqin içərisində çoxlu yemək üçün yararsız şeylər də olur. Odur ki, pudinq lotereya kimidir, kimə yaxşısı, kimə pisi düşür.
   
   Şotlandiya
   
   Şotlandiyada Yeni il ərəfəsində çəlləkdə qətran yandırır və çəlləyi bütün küçə boyu diyirləyirlər. Şotlandlar üçün bu, köhnə ilin yandırılmasıdır. Bundan sonra Yeni ilə yol açıqdır. Bu ölkədə hesab edirlər ki, Yeni ilin gəlişindən sonra evə girən ilk adam xoşbəxtlik və ya bədbəxtlik gətirir. Əgər evə hədiyyə ilə tündsaçlı kişi daxil olarsa, bu xoşbəxtlik əlamətidir.
   
   İrlandiya
   
   Yeni il ərəfəsində İrlandiyada evlərin qapıları taybatay açıq olmalıdır. İstənilən adam istədiyi evə daxil ola bilər, onu ən əziz qonaq kimi qarşılayacaq, bayram sürfəsi ətrafında ən şərəfli yerdə oturdacaq və şirin şəraba qonaq edəcəklər. Və ”Bu evdə və bütün dünyada sülh naminə” badə qaldıracaqlar. O birisi gün bayramın dostlar və tanışlar arasında qeyd olunması adətdir
   
   Rumıniya
   
   Bu ölkədə Yeni il axşamı süfrəyə içərisində kiçik sürprizlər - qəpiklər, farfor fiqurlar, acı bibər qabığı olan bayram qoğalı qoyulur. Qoğalda üzük tapılarsa, bu, o deməkdir ki, Yeni il çoxlu xoşbəxtlik gətirəcək. Acı bibər qabığı isə süfrə arxasına toplaşlanları yalnız güldürəcək.
   
   Bolqarıstan
   
   Elə ki Yeni il təqvimə qədəm qoyur, saatın son zərbəsində Bolqarıstanda bütün evlərdə bir neçə dəqiqəlyə işıqlar söndürülür. Yeni il öpüşmələri başlayır.    

   Yunanıstan
   
   Yeni ili qarşılamaq üçün qonaqlığa gedən Yunanıstan sakinləri özləri ilə daş götürür və onu qonaq gözləyən evin kandarına atırlar. Əgər daş ağırdısa, onda deyirlər - “Qoy ev sahibinin sərvəti bu daş kimi ağır olsun”. Yox, əgər daş kiçikdirsə, onda “Qoy ev sahibinin gözünə düşən ləkə bu daş kimi kiçik olsun” deyirlər.
   
   Hindistan
   
   Bu ölkədə Yeni ili müxtəlif cür qarşılayırlar. Ölkənin şimal əhalisi özlərini ağ, qırmızı, cəhrayı və bənövşəyi çiçəklərlə bəzəyirlər. Ölkənin mərkəzində evləri bənövşəyi bayraqlarla bəzəyirlər. Qərbdə evlərin damında od qalayırlar. Bayram ərəfəsində analar böyük qablara uşaqlar üçün hədiyyələr, şirniyyatlar və gül qoyurlar. Yeni ilin ilk günü səhər uşaqları gözübağlı nimçəyə yaxınlaşdırırlar ki, onlar özlərinə hədiyyə seçsinlər.