Noyabrın 15-də Heydər Əliyev Fondunun, Azərbaycanın Böyük Britaniyadakı səfirliyinin və “Baku” jurnalının birgə təşkilatçılığı ilə Londonda Azərbaycan xalçalarının “Azərbaycan: uçan xalçalarla nağıllar aləminə” adlı sərgisi açılıb. 
      
   Heydər Əliyev Fondunun Rusiya nümayəndəliyinin rəhbəri Leyla Əliyeva sərginin açılışında iştirak edib.
   Açılış mərasimində çıxış edən Azərbaycanın Böyük Britaniyadakı səfiri Fəxrəddin Qurbanov Azərbaycan xalçalarının Londonda nümayiş etdirilməsinə verdiyi dəstəyə görə Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevaya və Fondun Rusiya nümayəndəliyinin rəhbəri, “Baku” jurnalının baş redaktoru Leyla Əliyevaya minnətdarlığını bildirib, Azərbaycan mədəniyyətinin qədim qollarından biri olan xalçaçılıq sənəti haqqında danışıb. Sərginin keçirilməsini yüksək dəyərləndirən Britaniya-Azərbaycan Cəmiyyətinin həmsədri Lord Freyzer son illərdə Azərbaycanda güclü inkişafın müşahidə olunduğunu deyib.
   Heydər Əliyev Fondunun Rusiya nümayəndəliyinin rəhbəri Leyla Əliyeva tədbirdə çıxış edərək sərginin min bir gözəllik diyarı olan Azərbaycanın qədim və heyrətamiz nağıl aləmi ilə tanışlıq baxımından əhəmiyyətini vurğulayıb. Leyla Əliyeva xalqımızın xalçaçılıq sənətinin tarixindən söz açıb, Azərbaycanın əfsanəvi İpək Yolu üzərində yerləşdiyini, bu yolun isə təkcə ticarət yolu deyil, eyni zamanda, dəyərlərin və mədəniyyətlərin mübadiləsi üçün geniş bir dəhliz olduğunu vurğulayıb. O, ümidvar olduğunu bildirib ki, sərgi Azərbaycan mədəniyyəti ilə yaxından tanış olmağa imkan yaradacaq.
   Böyük Britaniyanın mədəniyyət naziri Ed Vaizey ölkəsinin Azərbaycanla mədəni əlaqələrindən danışıb, sərginin ölkələrimizin münasibətlərinin daha da güclənməsinə xidmət etdiyini deyib.
   Sərgi çərçivəsində “Azərbaycan” nəşrinin ingilis dilində versiyasının təqdimatı olub. Nəşrə daxil olan fotoşəkillər ölkəmizin tarixi, mədəniyyəti, təbiəti, bölgələri haqqında kifayət qədər dolğun təəssürat yaradır.
   Sonra tədbir iştirakçıları Azərbaycan xalçalarından ibarət sərgiyə baxıblar. Sərgidə coğrafi mövqeyinə, naxış kompozisiyasına, rəng həlli və texniki xüsusiyyətlərinə görə Azərbaycan xalçaçılıq məktəbinin bütün istiqamətləri təmsil olunub. Burada nümayiş etdirilən Quba, Abşeron, Şirvan, Gəncə, Qazax, Qarabağ və digər xalçaçılıq məktəblərinin nümunələri sərgiyə gələnlərdə böyük maraq doğurub. Sərgidə yer alan Qarabağ xalçaçılıq məktəbinin nümunələri Qarabağın əzəli Azərbaycan torpağı olduğunu bir daha hamının diqqətinə çatdırıb.
   Sərgidə səslənən Azərbaycan musiqisi də maraqla qarşılanıb. Heydər Əliyev Fondunun və Azərbaycan Televiziyasının birgə layihəsi olan muğam televiziya müsabiqəsinin qalibi Güllü Muradovanın və musiqiçi dostlarının ifaları hamını muğamın sehrli aləminə salıb.
   Sərgi noyabrın 21-dək davam edəcək.