“Azərbaycanda geniş oxucu kütləsi var, sadəcə olaraq oxucuların zövqünə uyğun kitab təklif etmək lazımdır” 
   
   Müsahibimiz “Altun kitab” nəşriyyatının direktoru Rafiq İsmayılovdur.
   
   - Rafiq müəllim, öncə “Altun kitab” nəşriyyatı barədə oxucularımıza bir qədər ətraflı məlumat verməyinizi istərdim.
   - “Altun-kitab” nəşriyyatı 2004-cü ildə yaranıb. Yarandığı gündən də uşaq ədəbiyyatı və dərsliklər nəşr edir. Biz öz nəşriyyat layihələrimizi hazırlayıb satışa çıxarırıq. Elə kitablar da var ki, onların xüsusi nəfis tərtibatda hazırlanması sponsorlar tərəfindən həyata keçirilir. Nəşr etdiyimiz “Qabusnamə”, “Azərbaycan musiqi alətləri” belə kitablardandır. “Qabusnamə” Moskvada keçirilən MDB ölkələrinin III Beynəlxalq “Kitab sənəti müsabiqəsində” dizayn işinə görə birinci yerə layiq görülüb. Bu cür kitablar istisna olmaqla, yerdə qalan kitablarımız geniş oxucu kütləsi üçün nəzərdə tutulub. Uşaq ədəbiyyatını yaş qrupları üzrə, silsilələrlə nəşr edirik. Məsələn, 4-7 yaşlılar üçün “Mənim kitabım”, 9-14 yaşlılar üçün “Dünya ədəbiyyatından seçmələr” və “Şifahi xalq ədəbiyyatı” seriyaları var. Müasir yazıçıların uşaqlar üçün əsərlərini də çap edirik. 100-ə yaxın kitabımız var, daha 100-dək kitabımız isə plandadır.
   - Bu gün kitab bazarında dırnaqarası nəşrlər də çoxdur. Necə düşünürsünüz, nəşriyyat bütün sifarişləri qəbul etməlidirmi?
   - Əgər təqdim olunan kitabın perspektivi yoxdursa, biz o sifarişdən imtina edirik. Bu bir biznes sahəsidir, eyni zamanda, “Altun kitab” maarifçi bir nəşriyyatdır. Məzmunu yaxşı olan bir kitaba görə bəzən biznesi də qurban veririk. Ancaq özümüz kitab layihələrini, seriyalarını düşünəndə, həm biznesi, həm də maarifçilik ənənəsini saxlamağa çalışırıq. Bizə təqdim olunan ucuz bir detektivin və yaxud melodramın yaxşı satılacağına əmin olsaq belə, imicimizə ziyan gətirəcəyindən ehtiyat edərək çap etmirik. Oxucu zövqünü nəzərə almağa çalışırıq.
   - Uşaq ədəbiyyatı məsuliyyətli bir sahədir. Maraqlıdır, niyə məhz bu sahəni seçdiniz?
   - Nəşriyyat sahəsində 20 ilə yaxındır çalışıram. Publisistik əsərlərdən tarixi əsərlərə qədər müxtəlif janrlı kitablar nəşr etmişik, reklam nəşriyyatı işində də bir qədər çalışmışıq. Bu işə başlamamışdan əvvəl oxucu tələbatını öyrənmək üçün araşdırmalar apardıq, sorğular keçirdik, məlum oldu ki, Azərbaycanda ən çox satılan kitablar uşaq ədəbiyyatı və dini ədəbiyyatdır. Dini ədəbiyyat bir qədər həssas mövzudur. Mən bu mövzunu kifayət qədər bilmədiyim üçün qəlbimin səsinə qulaq asıb uşaqları maarifləndirmək, onların zövqünü yüksəltmək üçün uşaq ədəbiyyatını seçdim. İkinci sinifdən yeddinci sinfə kimi Azərbaycan dili dərsliklərinin əsas müəllifiyəm. Məktəblərdə, açıq dərslərdə oluram, uşaqların nə istədiyini, müxtəlif yaş qruplarının oxucu tələbatını müəyyən qədər öyrənmişəm.
   - Yenə də uşaqların zövqünü oxşamaq çətindir.
   - Uşaq kitablarında mətnlə illüstrasiyalar bir-birini tamamlamalıdır. Elə seriyamız olub ki, bədii texniki tərtibat baxımından 8-9, ancaq mətnlər 14-15 yaşlılar üçündür. Bu kitablar heç də uğur qazanmadı. Bu sahədə uğur əldə etməkdən ötrü uzun müddət işləməlisən, illərlə külüng döyməlisən ki, axırda nəticə əldə edəsən. O ki qaldı illüstrasiyalara, bizimlə birlikdə işləyən Elçin Cabbarov geniş profilli rəssamdır. Mən onun rəsmlərini təsadüfən görmüşdüm və o an da hiss etmişdim ki, onun dəst-xətti kitab qrafikası janrına çox uyğundur. Ondan xahiş etdik ki, bizimlə işləsin, dəvətimizi qəbul etdi. Elçin Cabbarov uşaqların nə istədiyini bildiyi üçün onların zövqünü tuta bilir.
   - II Bakı Beynəlxalq Kitab Sərgi-Yarmarkasında hansı nəşrlərlə iştirak edəcəksiniz?
   - Sərgi-yarmarkada təxminən 100 adda kitabla çıxış edəcəyik. Bu kitabları sərgiyə gələn istənilən oxucu ala bilər. Yarmarkada seriyaların təqdimatını da keçirməyi planlaşdırırıq. Azərbaycanda geniş oxucu kütləsi var, sadəcə olaraq oxucuların zövqünə uyğun kitab təklif etmək lazımdır. Çox istərdim ki, bu sərgi ənənəvi keçirilsin və hamı bu tədbiri böyük kitab bayramı kimi səbirsizliklə gözləsin.
   
   Təranə Vahid