Xəbər verdiyimiz kimi, “British Council” (Britaniya Şurası) təşkilatı Mədəniyyət və Turizm Nazirliyi ilə mədəni əməkdaşlıq çərçivəsində “Teatr əməkdaşlığı” layihəsinə başlayıb. 
   Azərbaycan Dövlət Gənc Tamaşaçılar Teatrının mətbuat xidmətindən bildiriblər ki, dövlət və özəl teatrlarla əməkdaşlığı əhatə edən layihənin əsas məqsədi bir qrup gənc aktyor və texniki heyətin bacarıq və peşəkarlığını beynəlxalq standartlar səviyyəsində təkmilləşdirməyə kömək etməkdir.
   Layihə çərçivəsində Gənc Tamaşaçılar Teatrında ilk təlim 20 illik təcrübəyə malik peşəkar işıqlandırma dizayneri Maykl Manyon tərəfindən keçirilib. İki gün davam edən təlimlərə ölkəmizdə fəaliyyət göstərən müxtəlif teatrları təmsil edən 16 texniki işçi qatılıb.
   İkinci təlim isə peşəkar teatr rejissoru Yan Vilyem Van Den Boh tərəfindən fevralın 11-dən 15-dək gənc aktyorlar üçün keçiriləcək.