Gəncədə Xalq artisti, tanınmış aktyor Ələddin Abbasovun 90 illik yubileyi qeyd ediləcək. 1922-ci ilin mayında Gəncədə anadan olan sənətkar ömrünün sonunadək Gəncədəki Dövlət Dram Teatrında fəaliyyət göstərib. Xalq artistləri Əşrəf Yusifzadə, Rəmziyyə Veysəlova, Məmməd Bürcəliyev, Sədayə Mustafayeva, Zülfüqar Baratzadə və digər tanınmış aktyorlarla çiyin-çiyinə çalışıb. 1958-ci ildə respublikanın Əməkdar artisti, 1971-ci ildə Xalq artisti fəxri adlarına layiq görülüb. 70 ildən artıq yaradıcılıq yolu keçərək yüzlərlə dramatik və komik rollar ifa edib, 20-dən artıq filmdə çəkilib. “Mən ki, gözəl deyildim”də İmran, “Özgə ömrü”ndə ata, “Qatır Məmməd”də Məşədi Göyüş, “Nizami”də Xaqani rollarını məharətlə ifa edib. Xalq artistinin ən böyük və yaddaqalan obrazı isə “Dəli Kür” filmindəki Cahandar ağa obrazıdır.