Gənc kino işçiləri İttifaqa müraciət ünvanlayıblar
   
   Azərbaycan Respublikası Kinematoqrafçılar İttifaqından bildiriblər ki, bir qrup gənc kinematoqrafçı ittifaqın sədri, Xalq artisti, Dövlət mükafatları laureatı, professor Şəfiqə Məmmədovaya müraciət edib.
   
   ”Azərbaycanda kino sənəti bir əsrdən artıq dövr ərzində olduqca maraqlı inkişaf yolu keçmiş və bütün bu illər boyu xalqımızın mədəni-mənəvi həyatında mühüm rol oynamışdır. Azərbaycan Respublikasının Prezidenti cənab İlham Əliyevin milli kinomuzun inkişafına dair imzaladığı sərəncamlar kino ictimaiyyəti arasında ruh yüksəkliyinə səbəb oldu. Biz, gənc kinematoqrafçılar yaxşı başa düşürük ki, ölkəmizdə kino sənətinin öz ənənələrini bərpa etməsi, dünyada cərəyan edən kinematoqrafik proseslərin axarında inkişaf etməsi üçün dövlət tərəfindən ciddi tədbirlər görülür. Prezidentin sərəncamlarının mahiyyəti də elə bundan ibarətdir”, - deyə müraciətdə vurğulanır.
   Müraciətdə belə bir əminlik ifadə olunur ki, yeni yaradılmış Azərbaycan Respublikası Kinematoqrafçılar İttifaqı kino ictimaiyyətini səfərbər edə biləcək: “Sizə dəstək olmağa və bacarığımızı Azərbaycan Respublikası Kinematoqrafçılar İttifaqında bu işə sərf etməyə hazır olduğumuzu bildiririk”.
   Müraciəti gənc kino işçiləri: Xəyyam Abdullayev, Elməddin Alıyev, Səbinə Bağırzadə, Atəş Davudov, Rövşən Ağayev, Fariz Əhmədov, Rəsul Ələkbərov, Əziz Əliyev, Rövşən İsmayılov, Rəşad Qasımov, Bəhruz Qədirov, Günəş Mehdizadə, Rasim Mehdizadə, Murad Muradov, Vüqar Şıxəliyev, Yalçın Verdiyev imzalayıblar.
   
   * * *
   Bu arada bir qrup kinematoqrafçı - xalq artistləri Yalçın Əfəndiyev, Nuriyyə Əhmədova, Naxçıvan MR-in Əməkdar incəsənət xadimi Mehriban Ələkbərzadə, əməkdar mədəniyyət işçiləri Pərviz Quliyev, Kamil Məmmədov, Əməkdar artist Azad Şükürov, rejissorlar Rövşən İsmayılov, İlqar Safat, rəssam Mehriban Əfəndiyeva, aktyor Arif Kərimov Azərbaycan Kinematoqrafçılar İttifaqını tərk edərək yeni yaradılmış Azərbaycan Respublikası Kinematoqrafçılar İttifaqına üzvlük üçün müraciət ediblər.