20 Yanvarın kino salnaməsini yaradanlardan bəhs edən “Silahdaşlar” sənədli filmi təqdim olundu

Fevralın 19-da Nizami Kino Mərkəzində “Silahdaşlar” adlı tammetrajlı sənədli filmin ilk nümayişi keçirildi. Mədəniyyət Nazirliyinin “Salnaməfilm” studiyasında ekranlaşdırılan film 1990-cı ilin 20 Yanvar hadisələrini lentə alan kino işçilərinin fədakarlığından bəhs edir.

Ekran əsərinin ssenari müəllifi Xalq artisti Ramiz Fətəliyev, quruluşçu rejissoru Əməkdar incəsənət xadimi Nizami Abbasdır.  

Nümayişdən öncə Ramiz Fətəliyev çıxış edərək filmlə bağlı fikirlərini bölüşdü, onun çəkilmə səbəblərindən danışdı. Bildirdi ki, Azərbaycanın suverenliyi, istiqlaliyyəti və ərazi bütövlüyü uğrunda mübarizənin rəmzi olan 20 Yanvar hadisələri baş verənləri kinokameranın yaddaşına köçürən insanların fədakarlığı sayəsində tarixi salnaməyə çevrilib. “Silahdaşlar” həmin tarixi lentə alanlar haqqında filmdir.

Ssenari müəllifi filmin ərsəyə gəlməsində zəhməti olan hər kəsə təşəkkür etdi.

Sonra ekran əsəri nümayiş olundu.

Filmdə 1990-cı il yanvarın 20-nə keçən gecə sovet ordu hissələrinin Bakıda həyata keçirdiyi qırğınları, faciənin dəhşətli görüntülərini lentə almaq üçün əsl peşəkarlıq, eyni zamanda vətənpərvərlik nümayiş etdirən kino işçilərindən söz açılır. Həmin günlərdə C.Cabbarlı adına “Azərbaycanfilm” kinostudiyasının və “Salnaməfilm” studiyasının operatorları başda olmaqla çəkiliş qrupları yaradılmışdı. Onlar şəhərin müxtəlif yerlərində baş verən qanlı hadisələri lentə almaq üçün həyatlarını riskə atmışdılar.

Ekran əsərində həmin müdhiş gecədə və sonra Azərbaycanın müxtəlif rayonlarında törədilən faciələr haqqında xatirələrə və kadrarxası hadisələr barədə fikirlərə yer verilib.