Qəbələnin termal infrastrukturu haqqında təqdimat maraqla qarşılanıb

13-16 mart tarixində Yunanıstanın Loutra Pozar şəhərində Avropa Tarixi Termal Şəhərlər Assosiasiyasının (EHTTA) növbəti Baş assambleyası keçirilib.

İclasda Afyon (Türkiyə), Ladek Zdroj (Polşa), İstiea (Yunanıstan), Clermont-Auvergne Métropole (Fransa), Archena (İspaniya), Baden Bei Wien (Avstriya), Monchique və Luso (Portuqaliya) şəhərlərinin EHTTA-ya bərabərhüquqlu üzv kimi qəbul olunması haqqında qərar verilib.

Qəbələ şəhərinin 2019-cu ildə assosiasiyaya üzv seçilməsi ilə bağlı Azərbaycan Respublikası Mədəniyyət Nazirliyinin nümayəndəsi, layihənin koordinatoru Günel Aslanova tərəfindən təqdimat keçirilib. Qəbələ rayonunun termal infrastruktur imkanları və Qəbələ Dövlət Tarix-Bədii Qoruğu haqqında geniş məlumat böyük maraqla qarşılanıb.

Təqdimatdan sonra çıxış edən EHTTA-nın prezidenti Cüzeppe Bellandi Azərbaycanın son illər təşkilatda aktiv fəaliyyətini bəyəndiyini və görülən işlərin, əməkdaşlığın bundan sonra da davam edəcəyini deyib. O, bu ilin yayında təşkilatın mütəxəssislərinin UNESCO-nun tədbirində iştirak etmək məqsədilə Azərbaycana səfəri çərçivəsində Qəbələ şəhərinə baş çəkəcəkləri və şəhərin üzvlüyə qəbul olunacağını bildirib.

Xatırladaq ki, 2016-cı ildə Azərbaycanın Qalaaltı kurortu Avropa Tarixi Termal Şəhərlər Assosiasiyasına bərabərhüquqlu üzv seçilib və 2018-ci ilin mayında EHTTA-nın Baş assambleyası burada keçirilib. EHTTA 2019-cu ildə 10-dan çox beynəlxalq sərgidə təmsil olunacaq və bu sərgilərdə təqdim ediləcək rəsmi kataloqlarda Qalaaltı haqqında da məlumatlar yer alıb. EHTTA-nın saytında həmçinin Azərbaycanda il ərzində keçiriləcək “Formula 1 Azerbaijan Grand Prix” yarışları, V Mədəniyyətlərarası Dialoq Forumu, UNESCO-nun Dünya İrs Komitəsinin 43-cü sessiyası barədə də məlumatlar əksini tapıb.