Mayın 1-də Bakıdakı İbrahim Əbilov adına Mədəniyyət Mərkəzində 3-cü İMAGİNE Avropa Tolerantlıq Festivalı çərçivəsində fransız fotoqraf Nikolas Landemardın fotosərgisi açılıb.

N.Landemard sərgi barədə məlumat verib. Qeyd edib ki, üç hissədən ibarət olan sərginin birinci hissəsi “Fransa teatrında qaçqınların çıxışı” adlanır. Bu layihə Fransanın Lion şəhərindən başlayır. Fotoqraf teatrda çəkilişlər apararkən həm də ustad dərsləri verib. Bu teatrın özəlliyi ondan ibarətdir ki, burada səs yoxdur. Teatrda miqrantlar və qaçqınlar çıxış edirlər. Onlar fransız dilini bilmədikləri üçün ünsiyyətlərini him-cimlə qururlar.

İkinci hissənin mövzusu “Avropa siyasətçiləri” adlanır. Fotoqraf bu ad altında Avropa Komissiyası və Avropa Parlamentində siyasi liderlərin şəkillərini nümayiş etdirir. Fotoqraf Brüsseldə çəkiliş apararkən Avropanın bütün nöqtələrinə toxunur. N.Landemard öz çıxışında qeyd edib ki, bəzi fotomüxbirlər müharibə ocaqlarına gedərək oradan materiallar toplayırlar. Bu mənada Avropada qalmaq məqsədə uyğundur, daha Suriya kimi qaynar nöqtələrə getməyə ehtiyac qalmır.

Sərgidə üçüncü hissə “Brüsseldə yerləşən Avropa məhəllələri” adlanır. Belçikalılar bu ərazini “batmış məhəllə” adlandırırlar. Orada vaxtilə köhnə binalar olub, ancaq onlar sökülərək yerində zövqsüz, müasir binaların tikintisinə başlanılıb. Yerli camaat da bu məhəllədə aparılan işləri uğursuz layihə adlandırıb. Get-gedə böyüyən belə məhəllələrə belçikalılar “Brüsselizasiya” adını verib.

Tədbirdə çıxış edən Avropa İttifaqının Azərbaycandakı Nümayəndəliyi rəhbərinin birinci müşaviri Denis Daniilidis deyib: “Mən çox sevinirəm ki, çəkdiyimiz ağır zəhmətin nəticəsində biz bir daha İMAGİNE Avropa Tolerantlıq Festivalını sizlərə təqdim edə bildik. Bu festival çox fərqlidir, çünki o, mədəniyyətləri görüşdürür. Əsas odur ki, festivala gələn turistlər Azərbaycana bir dəfə gəlməklə kifayətlənmirlər. Onlar Azərbaycan mədəniyyətini kəşf etdikdən sonra buraya yenidən qayıdırlar. Çünki bu festivalın məqsədi körpülər qurmaqdır. Azərbaycan tolerant bir ölkə olduğundan belə bir kommunikasiya xətlərinin yaradılmasından qürur hissi keçiririk”.

Sonra sərgiyə baxış keçirilib.

Qeyd edək ki, festival Azərbaycan Respublikası Mədəniyyət Nazirliyi, “Cinema Plus”, “The Landmark” Biznes Mərkəzi, Nizami Kino Mərkəzi, “Bakı Metropoliteni” QSC, “Salaam Cinema”, Məhsəti Gəncəvi Mərkəzi, YARAT Müasir İncəsənət Mərkəzi, İbrahim Əbilov adına Mədəniyyət Mərkəzi, Azərbaycan Dövlət Mədəniyyət və İncəsənət Universiteti, ADA Universiteti və Venesiyanın “Ca Foscari” Universiteti tərəfindən dəstəklənir.