Bu il bir neçə yeni ekran əsərinin təqdimatı nəzərdə tutulub. Xaricdə yaşayan gənc azərbaycanlı rejissorların Cəfər Cabbarlı adına “Azərbaycanfilm” kinostudiyasında lentə aldıqları “Motivlər” kinoalmanaxının mart ayında ilk nümayişi olacaq.
Bu barədə “Azərbaycanfilm” kinostudiyasının direktoru Müşfiq Hətəmov jurnalistlərə məlumat verib.
İl ərzində yeni layihələrin həyata keçiriləcəyini deyən kinostudiyanın direktoru artıq bir neçə filmin tamamlanmaq üzrə olduğunu bildirib. Mayın əvvəlində Elxan Cəfərovun lentə aldığı “Əsgərin şücaəti” bədii filmi tamaşaçılara təqdim olunacaq. Ekran əsəri faşizm üzərində Qələbənin 70 illiyinə həsr olunub.