Azərbaycan Milli Xalça Muzeyində eşitmə qabiliyyəti zəif olan insanların iştirakı ilə tədbir keçirilib. Tədbirdə azyaşlılarla yanaşı, onların valideynləri də iştirak edib. 3 dekabr – Beynəlxalq Əlillər Günü ilə əlaqədar reallaşan tədbir zamanı Azərbaycan Milli Xalça Muzeyində ilk dəfə jest dilinə tərcümə ilə ekskursiya təşkil olunub, tamaşa göstərilib, ustad dərsləri keçilib.

Qonaqlar öncə Əməkdar rəssam İnna Kostinanın muzeydə nümayiş olunan “Kəlağayı: ipək qanadlar” sərgisinə baxıblar. İnna Kostina onlara əsərləri barədə, eyni zamanda kəlağayı sənəti haqqında ətraflı məlumat verib.

Sonra muzeyə ekskursiya təşkil edilib və “Şəngülüm, Şüngülüm, Məngülüm” nağılı əsasında hazırlanmış kilimarası kukla tamaşası nümayiş olunub.

Uşaqlara çətən, şəddə toxuma, xalça ornamentlərini rəngləmə üzrə ustad dərsləri də keçilib.

Qeyd edək ki, tədbir Azərbaycan Dövlət Pedaqoji Universiteti, “Karlara Dəstək” İctimai Birliyi, “Eşitmə və Nitq Məhdudiyyətli Şəxslərə Sosial Yardım” İctimai Birliyinin dəstəyi ilə reallaşıb.