Mədəniyyət naziri Anar Kərimovun müvafiq əmri ilə Əməkdar artist Əziz Yaşar oğlu Qarayusifli Bakı Xoreoqrafiya Akademiyasının tədris işləri üzrə prorektoru vəzifəsinə təyin olunub.

Əziz Qarayusifli 1968-ci ildə Bakı şəhərində  anadan olub. 1987-ci ildə  Bülbül adına Orta İxtisas Musiqi Məktəbini klarnet, 1994-cü ildə Üzeyir Hacıbəyli adına Bakı Musiqi Akademiyasını (BMA) orkestr və kamera ansamblının artisti ixtisası üzrə bitirib.

BMA-nın Opera studiyası orkestrinin rəhbəri (1994-1996), Üzeyir Hacıbəyli adına Azərbaycan Dövlət Simfonik Orkestrinin artisti (1996-2016) olub. 1990-cı ildən Azərbaycan Dövlət Akademik Opera və Balet Teatrı orkestrinin solisti, 2018-ci ildən Bakı Musiqi Akademiyasının dosentidir.

Ə.Qarayusifli 2018 və 2019-cu illərdə VII və VIII  Sankt-Peterburq  Beynəlxalq Mədəniyyət Forumlarının iştirakçısı və məruzəçisi olub. MDB-nin iştirakçı dövlətlərinin musiqi, mədəniyyət və incəsənət təhsili sahəsində əməkdaşlıq üzrə baza təşkilatı statusu verilmiş Qnesinlər adına Rusiya Musiqi Akademiyasının İctimai Şurasının üzvüdür. Bir sıra beynəlxalq müsabiqələrin münsiflər heyətində ölkəmizi təmsil edib.

2012-ci ildə Azərbaycan Respublikası Prezidentinin müvafiq sərəncamına əsasən, “Əməkdar artist” fəxri adına layiq görülüb.

Ə.Qarayusifli son təyinatadək Qara Qarayev adına Mərkəzi İncəsənət Məktəbinin direktoru vəzifəsində işləyib. Mərkəzi İncəsənət Məktəbinə rəhbərlik etdiyi müddətdə məktəbdə xoreoqrafiya sənətinə diqqət artırılıb, onun təşəbbüsü ilə məktəbdə “Alov” rəqs qrupu yaradılıb.

Məlumat üçün qeyd edək ki, Bakı Xoreoqrafiya Akademiyası Azərbaycan Respublikasında xoreoqrafiya sənəti ənənələrinin qorunması və inkişaf etdirilməsi zərurəti nəzərə alınaraq, bu sahə üzrə yüksəkixtisaslı kadrların hazırlanmasını təmin etmək məqsədilə Azərbaycan Respublikası Prezidentinin müvafiq sərəncamı ilə Bakı Xoreoqrafiya Məktəbinin bazasında yaradılan və ümumi, orta ixtisas və ali təhsil proqramlarını həyata keçirən ixtisaslaşmış təhsil müəssisəsidir. Akademiyanın yaradılması ilə xoreoqrafiya sənəti sahəsində unikal çoxpilləli və fasiləsiz təhsil sisteminin əsası qoyulub.