- 28-04-2021
- 2271
Aprelin 27-də Mədəniyyət Nazirliyi, Azərbaycan Rəssamlar İttifaqının dəstəyi, Azərbaycan Dövlət Rəsm Qalereyası, “İWS Azerbaijan” (İWS Globe – Beynəlxalq Suluboya Cəmiyyətinin Azərbaycandakı nümayəndəliyi) və Xətai Sənət Mərkəzinin təşkilatçılığı ilə elan olunmuş “Can Azərbaycan” Respublika qrafika və akvarel yaradıcılıq müsabiqəsinin qaliblərinin mükafatlandırması mərasimi keçirilib.
Xətai Sənət Mərkəzində gerçəkləşən tədbiri giriş sözü ilə Azərbaycan Dövlət Rəsm Qalereyasının direktoru Qalib Qasımov açaraq, iştirakçılarını salamlayıb və müsabiqənin əhəmiyyətindən danışıb. Bildirib ki, müsabiqənin məqsədi Ali Baş Komandanın rəhbərliyi altında rəşadətli Azərbaycan Ordusunun Vətən müharibəsində göstərdiyi igidliyi, azərbaycançılıq məfkurəsini və milli birliyimizi təsvir sənət müstəvisində nümayiş etdirmək, həmçinin akvarel və qrafika texnikası ilə çəkilmiş əsərlərə marağı artırmaq və təsviri sənətin bu istiqamətlərində çalışan rəssamların yaradıcılığını təşviq etməkdir.
Xətai Sənət Mərkəzinin direktoru Zahid Əvəzov layihəyə dəstək olan tərəfdaşlara, seçim heyətinə və müsabiqəyə qatılan hər kəsə təşəkkür edib.
İWS Globe – Beynəlxalq Suluboya Cəmiyyətinin Azərbaycandakı nümayəndəliyinin əməkdaşı Səbinə İskəndərli akvarel sənətinin özəlliklərindən danışıb.
Daha sonra qaliblərə mükafatlar təqdim edilib.
Akvarel sənəti üzrə qaliblər:
I yer – Hafiz Kərimov
II yer – Fatma Kılıç
III yer – Feyzi Məmmədov
Qrafika sənəti üzrə qaliblər:
I yer – Elmir Məmmədov
II yer – Günel Quliyeva
III yer – Əbülfəz Fərəcoğlu
Həvəsləndirici mükafat (5 yer):
Xanlar Əsədullayev
Gülşən Baxşəliyeva
Naibə Vəliyeva
Zeynəb Yaqubova
Leyla Vazehi
Tədbir zaman, həmçinin Xətai Sənət Mərkəzində akvarel qalereyasının təqdimatı olub. Qonaqlar qalereya ilə tanış olublar.
Qeyd edək ki, müsabiqədə seçilərək sərgilənən əsərlərin müəllifləri sertifikatlarını Xətai Sənət Mərkəzindən götürə bilər.
“Can Azərbaycan” müsabiqəsinin yekun sərgisini Azərbaycan Dövlət Rəsm Qalereyasının və Xətai Sənət Mərkəzinin sosial şəbəkə hesablarından izləmək mümkündür:
https://www.facebook.com/ADRQalereya.az/videos/294514242048792
https://www.facebook.com/Xetaisenetmerkezi/videos/2571384193167124
