Bəstəkarlıq müsabiqəsi keçiriləcək

Azərbaycan Respublikasının Mədəniyyət Nazirliyi, Azərbaycan Bəstəkarlar İttifaqı və Ü.Hacıbəyli adına Bakı Musiqi Akademiyasının (BMA) birgə təşkilatçılığı ilə 44 günlük Vətən müharibəsindəki şanlı Qələbəmizə həsr olunmuş bəstəkarlıq müsabiqəsi elan olunur. Müsabiqə 2021-ci ilin 1 may – 1 oktyabr tarixlərində keçiriləcək.

Simfonik əsər kateqoriyası üzrə keçirilən müsabiqədə yaşı 25-dən 35-ə qədər olan peşəkar bəstəkarlıq təhsili almış musiqiçilər iştirak edə bilər.

Təqdim olunan əsərləri münsiflər heyətinin üzvləri – Firəngiz Əlizadə (Xalq artisti, Bəstəkarlar İttifaqının sədri), Aydın Əzimov (Əməkdar incəsənət xadimi, Ü.Hacıbəyli adına BMA-nın professoru), Fəxrəddin Kərimov (Xalq artisti, Q.Qarayev adına Azərbaycan Dövlət Kamera Orkestrinin bədii rəhbəri və baş dirijoru), Həcər Babayeva (Əməkdar incəsənət xadimi, Ü.Hacıbəyli adına BMA-nın professoru) və Ayaz Qəmbərli (Bülbül adına Orta İxtisas Musiqi Məktəbinin müəllimi, bəstəkar) qiymətləndirəcəklər.

Əsərlərin müzakirəsi qapalı şəraitdə keçiriləcək. Müsabiqənin qalibləri barədə məlumatlar əsas mərhələ başa çatdıqdan sonra 15 oktyabr 2021-ci il tarixində Mədəniyyət Nazirliyinin rəsmi saytında (mct.gov.az) yayımlanacaq.

Qalib olmuş müəlliflərin əsərlərinin 8 noyabr 2021-ci il tarixində Azərbaycan Dövlət Akademik Filarmoniyasında keçiriləcək “Qələbə” konsertində səsləndirilməsi nəzərdə tutulur.