![](/img/news/700x420/_1621407065.jpg)
Prezident İlham Əliyev noyabrın 5-də Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında şəhid olmuş Azərbaycan Respublikası Silahlı Qüvvələrinin hərbi qulluqçularının təltif edilməsi haqqında sərəncam imzalayıb.
Sərəncama əsasən, Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərək şəhid olmuş Azərbaycan Respublikası Silahlı Qüvvələrinin hərbi qulluqçuları ölümündən sonra orden və medallara layiq görülüblər.
136 şəhid hərbi qulluqçu “Azərbaycan Bayrağı” ordeni ilə, 165 şəhid 3-cü dərəcəli “Rəşadət” ordeni ilə, 28 şəhid 3-cü dərəcəli “Vətənə xidmətə görə” ordeni ilə təltif edilib.
Sərəncamda, həmçinin ölümümdən sonra “Vətən uğrunda”, “İgidliyə görə”, “Cəsur döyüşçü”, “Döyüşdə fərqlənməyə görə”, “Suqovuşanın azad olunmasına görə” , “Cəbrayılın azad olunmasına görə”, “Xocavəndin azad olunmasına görə”, “Füzulinin azad olunmasına görə”, “Qubadlının azad olunmasına görə”, “Şuşanın azad olunmasına görə”, “Kəlbəcərin azad olunmasına görə”, “Ağdamın azad olunmasına görə”, “Laçının azad olunmasına görə” medalları ilə təltif olunmuş şəhid hərbi qulluqçuların siyahısı verilib.