Biz Ermənistanla əlaqələrimizin yaxşılaşdırılması üçün xüsusi nümayəndələr təyin etdik. Amma Azərbaycanın iştirakı olmadan bu prosesin davam etməyəcəyini Ermənistan da, bütün dünya da bilir və bilməlidir. Çünki bölgədə tam sülh istəyiriksə, bütün ölkələr arasındakı problemlərin aradan qaldırılması vacibdir.

Bu fikirləri Türkiyənin xarici işlər naziri Mövlud Çavuşoğlu ifadə edib.

O deyib: “Azərbaycan torpaqları otuz il işğal altında olub. Diplomatik səylər, Minsk qrupu, beynəlxalq sistem və ya əsas beynəlxalq aktorlar işğal olunmuş torpaqları geri almaq üçün heç nə etmədilər. Sonda Azərbaycanın səbiri tükəndi və Ermənistanın törətdiyi təxribatlara cavab olaraq Vətən müharibəsinə başladı və Qarabağ Zəfərini əldə etdi. Can Azərbaycanın qəhrəman Ordusu öz torpaqlarını geri aldı. Əslində, bununla sülh və rifah üçün bir fürsət yarandı. Lakin Ermənistan onu seçmək əvəzinə, daim təxribat törədir”.

Ermənistanın yenə də təxribatlara əl atdığını vurğulayan nazir Azərbaycanın buna cavab verdiyini bildirib: “Ermənistanın bundan dərs çıxarması, sülhü dəstəkləməsi lazımdır. Azərbaycan hərtərəfli sülh sazişi təklif edir. Biz bunu dəstəkləyirik. Birgə komissiya yaradılıb, sərhədlərin müəyyənləşdirilməsi, diqqətin buna yönəldilməsi lazımdır. Biz də Ermənistanla əlaqələrimizin yaxşılaşdırılması üçün xüsusi nümayəndələr təyin etdik. Amma Azərbaycanın iştirakı olmadan bu prosesin davam etməyəcəyini Ermənistan da, bütün dünya da bilir və bilməlidir. Çünki bölgədə tam sülh istəyiriksə bütün ölkələr arasındakı problemlərin aradan qaldırılması vacibdir. Bu mövzuda da əhəmiyyətli rol oynayırıq. Hər zaman dediyimiz kimi, can Azərbaycanın yanındayıq və bir daha deyirik, “Can Azərbaycan heç zaman tək deyil”.