2020-ci il sentyabrın 27-dən noyabrın 10-dək davam etmiş hərbi əməliyyatlar Azərbaycan tarixinə Vətən müharibəsi kimi yazılıb. Azərbaycan Respublikasının suverenliyi və ərazi bütövlüyü uğrunda müharibədə əsl qəhrəmanlıq nümunələri göstərmiş əsgər və zabitlərimiz, arxa cəbhədə çalışan vətəndaşlarımız, bütövlükdə Azərbaycan xalqı bu haqq və şərəf işində əzm və iradə, möhkəm birlik və həmrəylik nümayiş etdirib. Torpaqlarımız qəhrəman şəhidlərin qanı və canı bahasına işğaldan azad edilib. Azərbaycan xalqı və dövləti hər zaman mübariz oğul və qızlarının şücaətini yüksək qiymətləndirir, şəhidlərin ruhuna ehtiram göstərir, xatirəsini uca tutur.

Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarda dalğalandırmış, ölkənin ərazi bütövlüyü yolunda canlarını fəda etmiş əsgər və zabitlərə, bütün şəhidlərə dərin ehtiram əlaməti olaraq, Prezident İlham Əliyevin 2020-ci il dekabrın 2-də imzaladığı sərəncamla sentyabrın 27-si Azərbaycan Respublikasında Anım Günü elan edilib.
Bu münasibətlə Milli Kitabxananın əməkdaşları tərəfindən virtual sərgi hazırlanıb.

“27 sentyabr - Anım Günü” adlı virtual sərgidə bu əlamətdar günün təsis edilməsi haqqında Azərbaycan Respublikası Prezidentinin sərəncamı, mövzu ilə əlaqədar fotolar, məqalələr və kitablar nümayiş olunur.

Virtual sərgi ilə tanış olmaq istəyənlər http://anl.az/el/vsb/Veten_muharibesi_qehremanlari_unudulmur/index.htm linkindən istifadə edə bilərlər.