Azərbaycanda turizm sahəsi inkişaf etdikcə, bu sahənin ayrı-ayrı istiqamətləri üzrə məlumatlara da tələbat artır. Turizm mütəxəssisləri bunu nəzərə alaraq, müxtəlif mövzularda kitablar yazırlar.
   
   Bu nəşrlər turizm sektorunda çalışanlar üçün məlumat mənbəyi xarakteri daşımaqla bərabər, Azərbaycan Turizm İnstitutunun və digər universitetlərin turizm fakültəsində təhsil alan tələbələr üçün dərs vəsaiti rolunu da oynayır. Belə nəşrlərdən biri də bu yaxınlarda işıq üzü görən «Mehmanxanada ön büro» kitabıdır.
   Tanınmış turizm mütəxəssisi, Azərbaycan Turizm Assosiasiyası sədrinin müşaviri Müzəffər Ağakərimovun müəllifi olduğu kitab hotelin əsas şöbələrindən biri olan ön büronun strukturu, bölmələri, işləmə metod və üsullarından bəhs edir. Dərs vəsaiti kimi təqdim olunan «Mehmanxanada ön büro» Azərbaycan Turizm İnstitutu Elmi Şurasının qərarına əsasən çap edilib.
   Kitabın əvvəlində mehmanxanaların yaranma tarixi haqqında məlumat verilir. Sonrakı bölümlərdə mehmanxana tipləri, təsnifat sistemi, mehmanxana nömrələrinin təsnifatı, mehmanxana müəssisələrinin fəaliyyətinin iqtisadi əsasları, personala qoyulan tələblər araşdırılır.
   «Mehmanxana biznesində idarəetmə formaları» adlı bölümdə «françayzinq», müqavilə forması və icarə yolu ilə mehmanxanaların idarə edilməsinə aydınlıq gətirilib. «Azərbaycanda beynəlxalq mehmanxana şəbəkələri» bölməsində isə «Hilton Bakı», «Jumeirah Bilgah Beach Hotel», «Abşeron Marriott», «Kempinskiy Badamdar» və s. brend hotellərin tarixi, onların Azərbaycandakı fəaliyyəti haqqında bilgi verilir. Daha sonra “Ön büro”nun (Front Office), struktur və bölmələri, burada işlədilən ləvazimat və blank formaları təsvir edilir.
   Kitabın sonrakı fəsillərində qonağın qarşılanması, qəbulu və qeydiyyatı, mehmanxanalarda qonaqlara göstərilən xidmətlərin növləri və digər vacib məsələlərə aydınlıq gətirilib.
   Qeyd edək ki, Müzəffər Ağakərimov turizm sahəsinə dair onlarla kitabın müəllifidir. Ömrünün 40 ildən çoxunu bu sahəyə həsr edən mütəxəssis Azərbaycan Turizm İnstitutunun və Bakı Dövlət Universitetinin müəllimidir. 

  Fəxriyyə Abdullayeva