Qəbiristanlıqlarda günəş enerjisi panelləri qoyulur

İspaniyanın Valensiya şəhərində qəbiristanlıqları yaşıl enerji mərkəzlərinə çevirmək üçün iddialı planın bir hissəsi olaraq günəş enerjisi panelləri quraşdırılır.

“Requiem in Power” (RIP) layihəsi təxminən 2,8 MVt elektrik enerjisi istehsal etmək gücünə malik olacaq.

Layihənin təfərrüatlarını əks etdirən Avropa İttifaqının məlumat hesabatına görə, Valensiyadakı qəbiristanlıqlarda təxminən 7000 fotovoltaik panel quraşdırılıb. Bu ictimai yerlər təmiz enerji istehsalı üçün geniş yer təklif edir. İstehsal olunan enerji həm kommunal xidmətlərdə, həm də şəhər sakinlərinin evlərində istifadə olunacaq. Hesablamalara görə, RIP layihəsi tam fəaliyyətə başlayanda hər il 140 tona qədər karbon emissiyasının qarşısını alacaq. Bu layihə “Valensiya 2030” İqlim Məqsədi çərçivəsindədir.

Valensiya qəbiristanlıqda günəş panelləri quraşdıran ilk yer deyil. Fransada Saint-Joachim kommunası 2021-ci ildə qəbiristanlığını bərpaolunan enerji mərkəzinə çevirmək üçün layihəyə başlayıb. Layihə üzrə 2025-ci ilə qədər təxminən 3,3 milyon avro dəyərində 5000 panel quraşdırmaq planlaşdırılır.