Mən fəxr edirəm ki, Azərbaycan Prezidenti İlham Əliyevin dəvəti ilə Türk Dövlətləri Təşkilatının (TDT) Şuşada keçirilən qeyri-rəsmi sammitində Kipr türk xalqını təmsil etmişəm. Türk dünyasının gücü birlikdədir!

Bunu Şimali Kipr Türk Respublikasının (ŞKTC) Prezidenti Ersin Tatar bazar günü Lefkoşada keçirilən brifinqdə Azərbaycana səfərinin yekunlarını şərh edərkən bildirib.

Ersin Tatar göstərilən xüsusi diqqət və qonaqpərvərliyə görə Azərbaycana minnətdarlığını bildirib. “ŞKTC nümayəndələri Azərbaycanda dövlət protokoluna uyğun olaraq qarşılanıb. Bu, əvvəllər yalnız Türkiyədə olub. Prezident İlham Əliyevə, eləcə də Şuşada sammitin təşkilində iştirak edən hər kəsə minnətdaram”, - deyə Tatar vurğulayıb.

Siyasətçi işğaldan azad edilmiş Xankəndi şəhərinə səfər etməkdən məmnunluğunu ifadə edib.

Tatar uzun müddətdir ki, bu cür əhəmiyyətli dialoq platformasında iştirak etməyə ümid etdiyini etiraf edib. “Bizim məqsədimiz TDT çərçivəsində əlaqələrin hərtərəfli inkişafıdır. ŞKTC bayrağının da Şuşada dalğalanmasından çox şadam”, - deyə ŞKTC lideri bildirib. Tatar eyni zamanda Aİ-nin ayrı-ayrı siyasətçilərinin Lefkoşanın Şuşada TDT-nin qeyri-rəsmi sammitinə dəvəti ilə bağlı reaksiyasını tənqid edib.

ŞKTC Prezidentinin sözlərinə görə, türk dövlətləri ilə əlaqələrin inkişafı Kipr türklərinin mövqelərinin möhkəmlənməsinə və Kiprdə “iki dövlət” prinsipinə uyğun ədalətin bərqərar olmasına mühüm töhfə verir.

Xatırladaq ki, 2022-ci il noyabrın 11-də TDT-nin Səmərqənddə (Özbəkistan) keçirilən IX Zirvə toplantısında Şimali Kipr Türk Cümhuriyyəti təşkilata müşahidəçi üzv qəbul edilib. TDT sammitində alınan bu əlamətdar qərar Şimali Kiprdə ruh yüksəkliyi ilə qarşılanıb.

ŞKTC Prezidenti Ersin Tatar bunu  “tarixi qərar” kimi qiymətləndirmiş və “Şimali Kipr Türk Cümhuriyyətinin öz adı ilə bir beynəlxalq təşkilata qəbul edilməsi adada iki dövlətin mövcudluğu yönündə illərdir apardığımız siyasi mücadilənin dəstəklənməsidir və bunun önəmi çox böyükdür”, – deyə bildirmişdi.

ŞKTC ilk dəfə məhz Azərbaycan Prezidentinin dəvəti ilə TDT-nin Şuşada keçirilən sammitində təşkilatın müşahidəçi üzvü kimi təmsil olunub.