Salyan Dövlət Rəsm Qalereyasında 2 avqust - Azərbaycan Kinosu Günündə "Art kino" layihəsi təqdim edilib.

Tədbirdə rayon rəsmiləri, sənətçilər, mədəniyyət işçiləri və ictimaiyyət nümayəndələri iştirak ediblər.
Salyan Dövlət Rəsm Qalereyasının direktoru kinorejissor Kürçaylı Məmmədov Azərbaycan kinosunun yaranma tarixi və "Art kino" layihəsi barədə məlumat verib.

Salyan Rayon İcra Hakimiyyətinin rəsmisi Məhərrəm Məmmədov, Salyan Dövlət Kukla Teatrının baş rejissoru Əməkdar artist Rafiq Mirzə, Azərbaycan Rəssamlar İttifaqının üzvü, rəssam İman Mustafayev, uzun zaman mədəniyyət sahəsində çalışmış Lətif Zərbəliyev, mədəniyyət işçisi Leyla Babayeva və başqaları çıxış edərək milli kinomuzun keçdiyi inkişaf yolundan və Ulu öndər Heydər Əliyevin kinomuza göstərdiyi diqqət və qayğıdan danışıblar.

Sonra Xalq rəssamı Elbəy Rzaquliyevin (1926-2007) həyat və yaradıcılığına həsr olunan "Arzularını çəkən rəssam" bədii-sənədli filmi nümayiş olunub.

Qeyd edək ki, layihə çərçivəsində müntəzəm olaraq rəssamların həyat və yaradıcılığına həsr olunan filmlər nümayiş etdirilir. Bundan əlavə, səyyar film nümayişləri də nəzərdə tutulur.

Nurəddin