Azərbaycan Kinosu Günü - kino işçilərinin peşə bayramı (2 avqust) bölgələrdə də müxtəlif səpkili tədbirlərlə qeyd edilib.

Quba-Xaçmaz Regional Mədəniyyət İdarəsinin (RMİ) təşkilatçılığı ilə Bəşir Səfəroğlu adına Quba rayon Mədəniyyət Mərkəzində Azərbaycan Kinosu Gününə həsr edilən "Bizim filmlərimiz" adlı tədbir keçirilib.

Əvvəlcə qonaqlar Azərbaycan kinosunun tarixindən, kino sənətinin əsaslarından və milli kinomuzun inkişafında müstəsna xidmətləri olan incəsənət ustalarının həyat və yaradıcılığından bəhs edən kitab və jurnallardan ibarət sərgi ilə tanış olublar. Çıxışlarda dünya kinosunun yaranmasından qısa müddət sonra yaranan milli kinomuzun ötən 126 il ərzində keçdiyi inkişaf yolundan söz açılıb. Ölkəmizdə kino sənətinə göstərilən dövlət qayğısı xüsusi qeyd olunub.

Daha sonra rayon Mədəniyyət Mərkəzinin "Art" yaradıcılıq studiyasının Quba Könüllülər Teatrının iştirakı ilə dahi Azərbaycan şairi və mütəffəkkiri Nizami Gəncəvinin "Kərpickəsən kişinin dastanı" mənzum hekayəsi əsasında lentə aldığı eyniadlı qısametrajlı bədii film nümayiş olunub.

***

Azərbaycan Kinosu Günü ilə əlaqədar Dağlıq Şirvan RMİ və DOST İnklüziv İnkişaf və Yaradıcılıq Mərkəzinin “DOST Evi” filialının birgə təşkilatçılığı ilə tədbir keçirilib.

Tədbir çərçivəsində həssas əhali qruplarından olan şəxslər İsmayıllı rayonunda yerləşən Heydər Əliyev Mərkəzi ilə tanış olublar. Tədbir iştirakçıları İsmayıllı rayon MKS-nin Uşaq şöbəsində “Heydər Əliyev və Azərbaycan kinosu” adlı filmi izləyiblər.

Sonda İsmayıllı rayon Heydər Əliyev adına Mədəniyyət Mərkəzi solistlərinin ifasında konsert proqramı təqdim edilib.

Nurəddin