Quba rayon MKS-nin Uşaq şöbəsinin təşkilatçılığı ilə “Quba meydanı” mədəniyyət və istirahət parkında uşaqlara səyyar kitabxana xidməti göstərilib. Səyyar xidmətin təşkilində əsas məqsəd kiçikyaşlı oxucuların kitabxanaya, kitaba marağını artırmaq, onlarda mütaliə vərdişlərini inkişaf etdirməkdən ibarət olub.

Sərgidə kitabxanaya daxil olmuş yeni ədəbiyyat, oxucuların maraq dairəsinə uyğun kitablar nümayiş etdirilib. Yeni dərs ilinin başlanmasına qədər açıq havada belə sərgilərin davamlı olaraq təşkil edilməsi nəzərdə tutulub.

***

Cəlilabad rayon Şabanlı kənd Mədəniyyət evində “Dünyamızı qoruyaq!” devizi altında iməcilik təşkil edilib. İməcilik zamanı müəssisənin yerləşdiyi ərazidə təmizlik işləri aparılıb.

Lerik rayon Mədəniyyət Mərkəzi və rayon Gənclər və idman sektorunun təşkilatçılığı ilə “Breyn rinq” intellektual oyunu üzrə yarış keçirilib. Gənclərdən ibarət 5 komandanın iştirak etdiyi yarışda “Qacar” komandası I, “Turan” komandası II, “Bayraqdar” komandası isə III yerə layiq görülüb.

***

Salyan Tarix-Diyarşünaslıq Muzeyi və “Nuray” art-studiyasının birgə təşkilatçılığı ilə “Tarixin rəngləri” mövzusunda ustad dərsi keçirilib. İştirakçılara ebru sənəti və keramika üzərində iş mövzusunda məruzələr söylənilib, əyani olaraq əl işləri hazırlanıb.

Hacıqabul rayon Heydər Əliyev Mərkəzi və rayon Tarix-Diyarşünaslıq Muzeyinin birgə təşkilatçılığı ilə “Qəhrəman böyüdən analar” layihəsi həyata keçirilir. Layihənin məqsədi şəhid valideynlərinə mənəvi dəstək olmaq, şəhidləri tanıtdırmaq və gənc nəslin vətənpərvər ruhda tərbiyəsinə töhfə verməkdir. Layihə çərçivəsində ilk olaraq Azərbaycan Ordusunun 2023-cü ilin 19-20 sentyabr tarixlərində Qarabağda həyata keçirdiyi antiterror əməliyyatı zamanı şəhidlik zirvəsinə yüksəlmiş Əlimirzə Mirzəyevin ailəsi ziyarət edilib, şəhidin ev-muzeyi ilə tanışlıq olub.

***

Ağdaş Dövlət Rəsm Qalereyası və Gənclərin İnkişaf və Karyera Mərkəzi Ağdaş nümayəndəliyinin təşkilatçılığı ilə Heydər Əliyev parkında ustad dərsi təşkil olunub. Gənclər geyim üzərində rəngli boyalarla müxtəlif rəsmlər çəkiblər.

***

Ağstafa Dövlət Rəsm Qalereyasının təşkilatçılığı ilə Heydər Əliyev adına istirahət parkında “Fırçadakı dünyam” adlı rəsm sərgisi keçirilib. Sərgidə canlı musiqinin müşayiəti ilə yerli rəssamların, həmçinin istedadlı uşaq və gənclərin əl işləri nümayiş etdirilib.

***

Lənkəran şəhər Heydər Əliyev Mərkəzinin təşkilatçılığı ilə “Tariximiz qürurumuzdur” layihəsi çərçivəsində Vətən müharibəsi şəhidi Kənan Axundzadənin doğum gününə həsr olunmuş tədbir keçirilib.

Lənkəran şəhər Mədəniyyət Mərkəzində gerçəkləşən tədbirdə qonaqlar şəhidin şəxsi əşyalarından və fotolarından ibarət sərgi ilə də tanış olublar. Məktəblilər şeirlər söyləyib, müğənnilərin ifasında şəhidlər haqqında mahnılar səsləndirilib. Heydər Əliyev Mərkəzinin rəsm studiyasında yağlı boya ilə çəkilmiş Kənan Axundzadənin portreti şəhidin anasına təqdim edilib.

***

Qubadlı rayon Vasili Əliyev adına Mədəniyyət evi və rayon Mahmudlu kənd Mədəniyyət evinin (Sumqayıt şəhəri) birgə təşkilatçılığı ilə  “Yaşıl dünya naminə həmrəylik ili” münasibətilə  “Ekologiya və sağlam həyat” mövzusunda dəyirmi masa keçirilib. Bədii qiraət dərnəyinin üzvləri təbiətin tərənnümünə həsr olunan şeirlər səsləndiriblər.

Nurəddin Məmmədli