Xəbər verildiyi kimi, avqustun 23-də Azərbaycanın birinci xanımı Mehriban Əliyeva və qızı Leyla Əliyeva Daşkənddə Özbəkistanın birinci xanımı Ziroatxon Mirziyoyeva və qızı Saida Mirziyoyeva ilə birgə bu ölkənin Xalq rəssamı Akmal Nurun əsərlərindən ibarət sərgi ilə tanış olub, özbək milli geyimlərindən ibarət kolleksiyaya baxıblar.

“Sevgi bağında” adlı sərgidə rəssam Akmal Nurun son illərdə çəkdiyi əsərlər nümayiş olunur.

O, sərgidə yer alan əl işləri barədə məlumat verib. Bildirib ki, əsərlərdə ana sevgisi və kənd həyatının motivləri, ailə və ən əsası, Tanrının insana bəxş etdiyi talelər canlandırılıb.

Sonra birinci xanımlar və qızları naxışçı Mədinə Kasımbayevanın kolleksiyası ilə tanış olublar. Hər bir məmulat ənənəvi özbək naxışvurmasının müxtəlif texnikalarından istifadə olunmaqla əllə yerinə yetirilib.

Qeyd olunub ki, “Süzane” naxışının vurulmasında pambıqdan və ipəkdən hazırlanmış materiallardan istifadə edilir. Saplar əllə boyanır, sonra dağ kvarsı və duz əlavə olunmaqla qaynadılır ki, bu da saplarda boyanın uzunmüddətli qalmasından ötrüdür.

Birinci xanım Mehriban Əliyevaya Özbəkistan mədəniyyətinin təbliğ olunduğu xatirə hədiyyələri təqdim edilib.