Salyan rayon Mərkəzi Kitabxanası və rayon Mədəniyyət Mərkəzinin birgə təşkilatçılığı ilə Əməkdar müəllim, tanınmış şair Oqtay Rzanın (1934–2019) 90 illik yubileyi münasibətilə tədbir keçirilib.

Çıxışlarda şairin həyat və yaradıcılığı haqqında məlumat verilib. Qeyd olunub ki, Oqtay Rza 70 il ədəbi yaradıcılıqla məşğul olub, 20-dən çox kitabı çap edilib və əsərləri xarici dillərə tərcümə olunub. Şairin əsas qayəsi Vətənə məhəbbətin, mənəvi-əxlaqi zənginliklərin təbiət gözəllikləri ilə vəhdətdə tərənnümündən ibarət olan yaradıcılığı bu gün də gənc nəslin tərbiyəsində əhəmiyyət kəsb edir.

Kitabxananın bədii qiraətçiləri şeirlər söyləyib, rayon Mədəniyyət Mərkəzinin solistləri şairin şözlərinə bəstələnən mahnılar ifa ediblər.

Sonda Oqtay Rzanın bacısı Səfurə Rzayeva ailə üzvləri adından çıxış edərək tədbirin təşkilatçılarına və iştirakçılara minnətdarlığını bildirib.