Məşhur amerikalı bəstəkar və prodüser Kuinsi Cons noyabrın 3-də, 91 yaşında vəfat edib.

14 mart 1933-cü ildə Çikaqoda anadan olan Kuinsi Cons Frenk Sinatra, Maykl Cekson kimi ulduzlarla əməkdaşlıq edib, gənc yaşlarında müxtəlif caz qruplarının üzvü olub.

Onun 50-ci illərdə F.Sinatra ilə başlayan əməkdaşlığı 1984-cü ilə qədər, müğənninin  son studiya albomu olan “LA is my lady” çıxana qədər davam edib.

Bəstəkar və prodüser 70-ci illərin sonlarında ulduzu parlayan Maykl Ceksonla əməkdaşlığa başlayıb. O, Ceksona dünya şöhrəti gətirən “Off the Wall”, “Thriller” və “Bad” albomlarının prodüseri olub.

Musiqi karyerası ərzində Kuinsi Cons 80 dəfə “Grammy” mükafatına namizəd olub və 28 dəfə bu mükafatı qazanıb.