Zəfər Günü münasibətilə bölgələrdə silsilə tədbirlər keçirilib

Ağcabədi şəhər Üzeyir Hacıbəyli adına Uşaq incəsənət məktəbi 8 Noyabr – Zəfər Günü münasibətilə konsert proqramı ilə çıxış edib.

Şəhid ailələrinin də iştirak etdiyi tədbirdə çıxış edənlər 44 günlük Vətən müharibəsində qazanılan şanlı Qələbədən, hərbçilərimizin döyüş meydanında göstərdiyi qəhrəmanlıqlardan danışıb, şəhid ailələri, qazilər və müharibə veteranlarına göstərilən diqqət və qayğıdan söz açıblar.

Məktəbin müəllim və şagirdlərinin ifasında konsert proqramı təqdim olunub.

Müəllimlərdən ibarət ansamblın müşayiəti ilə səs və piano şöbələrinin şagirdləri müxtəlif musiqi nömrələri səsləndiriblər.

***

Şəki-Zaqatala Regional Mədəniyyət İdarəsi (RMİ), Şəki Şəhər İcra Hakimiyyəti və Şəki Dövlət Kollecinin birgə təşkilatçılığı ilə konsert keçirilib.

Şəki şəhərindəki Bəxtiyar Vahabzadə adına mədəniyyət və istirahət parkında reallaşan konsertdə Şəki-Zaqatala RMİ-nin tabeliyində fəaliyyət göstərən musiqi və incəsənət məktəblərinin müəllim və şagirdləri rəngarəng musiqi və rəqs nömrələri ilə çıxış ediblər.

Şəki-Zaqatala RMİ-nin dəstəyi, Şəki şəhər Heydər Əliyev Mərkəzi və 2 nömrəli Uşaq musiqi məktəbinin təşkilatçılığı ilə konsert proqramı keçirilib.

Konsertdən öncə Şəki şəhər Rasim Ocaqov adına Uşaq-gənclər inkişaf mərkəzi şagirdlərinin əl işlərindən ibarət sərgi təşkil olunub. Sonra 2 nömrəli Uşaq musiqi məktəbinin müəllimlərdən ibarət ansamblının ifasında milli musiqilər səsləndirilib, rəqs nümunələri göstərilib.

***

Ağdaş rayonunda Ulu öndər Heydər Əliyevin adını daşıyan parkda bayram konserti təşkil olunub.  Ağdaş Rayon İcra Hakimiyyəti, Mərkəzi Aran RMİ-nin rəhbərliyi, millət vəkilləri, şəhid ailələrinin üzvləri və müharibə veteranları, rayon sakinlərinin iştirakı ilə reallaşan tədbirdə qeyd edilib ki, 2020-ci il noyabrın 8-də şanlı Ordumuz tərəfindən Şuşa şəhərinin işğaldan azad edilməsi müharibənin gedişinə və taleyinə həlledici təsir göstərərək Zəfər Günü kimi tariximizə yazılıb.

Konsertdə incəsənət ustalarının ifasında səsləndirilən Zəfər tariximizə həsr olunan mahnılar iştirakçılar tərəfindən alqışlarla qarşılanıb. Bayram əhvali-ruhiyyəsi ilə keçən tədbir atəşfəşanlıqla yekunlaşıb.

***

Kürdəmir rayon Mədəniyyət Mərkəzinin təşkilatçılığı ilə “Qərənfildən xarıbülbülə” adlı tədbir keçirilib. Çıxış edənlər 44 günlük Vətən müharibəsində xalqımızın nümayiş etdirdiyi birlikdən, Ordumuzun şücaətindən və bunların nəticəsi olan şanlı Zəfərimizdən danışıblar. Kürdəmirli yazarlar Qarabağın işğalı və xilası haqqında yazılmış kitablardan oçerklər səsləndirib, xatirələrini bölüşüblər.

***

Gəncə-Daşkəsən və Şərqi Zəngəzur RMİ-lərin tabe müəssisələrində Zəfər Günü ilə bağlı silsilə tədbirlər keçirilib. Tədbirlərdə Ordumuzun qazandığı Qələbənin tarixi əhəmiyyətindən, bu qüruru bizə yaşadan qəhrəmanlarımızın keçdiyi şərəfli döyüş yolundan bəhs edilib.

***

Zəfər Günü ilə əlaqədar Sabirabad Rayon İcra Hakimiyyətinin təşəbbüsü, Mil-Muğan RMİ-nin tabeliyində fəaliyyət göstərən mədəniyyət müəssisələrinin təşkilatçılığı ilə tədbir keçirilib. Sabirabad rayonunun mərkəzi meydanında təşkil olunan tədbirdə mədəniyyət nümayəndələrinin ifasında tarixi Zəfərimizə həsr edilən rəngarəng musiqi proqramı, Sabirabad rayon Əhmədabad xalq folklor kollektivi tərəfindən rəqs nömrələri nümayiş olunub. Tədbirin sonunda atəşfəşanlıq təşkil edilib.

***

Mil-Muğan RMİ-nin İmişli rayonu üzrə fəaliyyət göstərən mədəniyyət müəssisələrinin və İmişli Rayon İcra Hakimiyyətinin birgə təşkilatçılığı ilə "Bu Zəfərin mübarəkdir, ey Vətən!" adlı tədbir keçirilib. Ulu öndər Heydər Əliyevin adını daşıyan istirahət parkında reallaşan tədbirdə İmişli şəhər Uşaq incəsənət məktəbinin müəllim və şagirdlərinin rəsm əsərlərindən, İmişli Dövlət Rəsm Qalereyasının fondunda olan şəkillərdən ibarət sərgi təşkil edilib.

***

Beyləqanda rayon İcra Hakimiyyətinin təşəbbüsü və təşkilatçılığı, Mil-Muğan RMİ-nin tabeliyində fəaliyyət göstərən mədəniyyət müəssisələrinin dəstəyi ilə bayram tədbiri keçirilib.

Mədəniyyət nümayəndələrinin ifasında Zəfərimizə həsr edilən şeirlər səsləndirilib, rəngarəng musiqi və rəqs nömrələrindən ibarət bədii, musiqili proqram nümayiş olunub.

***

Saatlı Rayon İcra Hakimiyyəti və Mil-Muğan RMİ-nin Saatlı rayonu üzrə fəaliyyət göstərən mədəniyyət müəssisələrinin birgə təşkilatçılığı ilə tədbir keçirilib.

Rayonun Heydər Əliyev meydanında düzənlənən konsert proqramında yerli mədəniyyət nümayəndələrinin ifasında səsləndirilən mahnılar, eləcə də “Adıgün” türk xalq folklor kollektivinin çıxışları Azərbaycan və Türkiyə bayraqları ilə meydana axışmış yüzlərlə rayon sakini tərəfindən coşqu ilə qarşılanıb.

Tədbirin sonunda bayram günü münasibətilə atəşfəşanlıq təşkil edilib.

***

Şirvan-Salyan RMİ-nin tabeliyindəki Şirvan şəhər Heydər Əliyev Mərkəzi, Mərkəzi Kitabxana, Tarix-Diyarşünaslıq Muzeyi, Salyan Dövlət Rəsm Qalereyası, Mədəniyyət Mərkəzi, Mərkəzi Kitabxana, Biləsuvar rayon Mərkəzi Kitabxanası, Tarix-Diyarşünaslıq Muzeyi, Neftçala Dövlət Rəsm Qalereyası, Mədəniyyət Mərkəzi, Tarix-Diyarşünaslıq Muzeyi, Heydər Əliyev Mərkəzi və Mərkəzi Kitabxanasında sərgilər, açıq dərslər və digər tədbirlər təşkil olunub.

***

Biləsuvar rayon Heydər Əliyev Mərkəzinin təşkilatçılığı, YAP Biləsuvar rayon təşkilatı və digər qurumların dəstəyi ilə "Zəfərimiz" adlı tədbir keçirilib.

Çıxış edənlər torpaqlarımızın işğaldan azad edilməsində misilsiz qəhrəmanlıq göstərən şəhid və qazilərimizin döyüş yolundan söhbət açıblar. Sonra Zəfər Gününə həsr olunan videoçarx nümayiş etdirilib.

Tədbirin sonunda Biləsuvar rayon Mədəniyyət Mərkəzinin əməkdaşları və rayon məktəblilərinin ifasında ədəbi-bədii kompozisiya təqdim olunub, vətənpərvərlik ruhunda mahnılar səsləndirilib.

***

Qazax rayon Mədəniyyət Mərkəzində "Sən qalibsən, Azərbaycanım!" adlı bayram tədbiri təşkil edilib.

Tədbir Zəfər Gününə həsr edilmiş videoçarxın nümayişi ilə başlayıb. Çıxış edənlər Vətən müharibəsində qazanılan Qələbənin tariximizə qızıl hərflərlə həkk olunduğunu bildiriblər.

Mədəniyyət Mərkəzinin "Göyəzən" instrumental ansamblı, Qazax şəhər 1 və 2 nömrəli Uşaq musiqi məktəbləri müəllimlərinin ifasında təqdim olunan maraqlı çıxışlar tədbirə xüsusi rəng qatıb.

***

Ağstafa şəhər Hüseyn Arif adına Uşaq musiqi məktəbində "Müqəddəs Zəfər" başlıqlı tədbir keçirilib. Məktəbin şagird və müəllimləri bir-birindən maraqlı musiqi nömrələri ilə çıxış ediblər.

***

Lənkəran şəhərindəki Heydər Əliyev adına xatirə parkında Zəfər Günü münasibətilə konsert təşkil olunub. Konsert proqramında incəsənət nümayəndələrinin ifalarında vətənpərvərlik ruhlu mahnılar səsləndirilib, rəqslər nümayiş etdirilib. Sonda atəşfəşanlıq olub.

***

Lerik rayon Mədəniyyət Mərkəzində təşkil olunan bayram tədbirində əvvəlcə iştirakçılar Lerik Dövlət Rəsm Qalereyasının hazırladığı “Zəfər dastanı” adlı sərgiyə baxış keçiriblər.

Sonra tədbir rayon Mədəniyyət Mərkəzi, Heydər Əliyev Mərkəzi və Tarix-Diyarşünaslıq Muzeyinin birgə hazırladığı konsert proqramı ilə davam edib.