Laçın rayon Ərdəşəvi kənd Uşaq musiqi məktəbinin (müvəqqəti Abşeron rayonunda yerləşir) şagirdləri Azərbaycan Gənclər İttifaqının təşkilatçılığı ilə keçirilən “Payız əfsanələri – 2024” adlı müsabiqədə uğurla iştirak ediblər. Qarmon ixtisası üzrə Ömər Kərimli Qran-pri, tar ixtisası üzrə Ənvər Əsədov və Ülvü Həsənli I, qarmon ixtisası üzrə Ramil Ağayev III yerə layiq görülüblər. Şəkər Əkbərova (fortepiano) fəal iştirakçı kimi mükafatlandırılıb.

***

Hacıqabulda “Mənim qəhrəman şəhidim” adlı məqalə müsabiqəsinin yekun mərhələsi keçirilib. Hacıqabul rayon Heydər Əliyev Mərkəzi və rayon Təhsil sektorunun birgə təşkilatçılığı ilə gerçəkləşən müsabiqədə 19 məktəbli iştirak edib. Müsabiqənin məqsədi gənc və yeniyetmələrə vətənpərvərlik ruhunun aşılanması, şəhidlərin həyatı və onların müharibədə göstərdikləri şücaətlərin çatdırılmasıdır. Qaliblər rayon Heydər Əliyev Mərkəzi tərəfindən diplom və hədiyyələrlə təltif edilib.

***

Masallı rayon Mərkəzi Kitabxanasında görkəmli şair Abbas Səhhətin (1874–1918) anadan olmasının 150 illiyi ilə əlaqədar tədbir keçirilib. Qeyd olunub ki, “Vətənimdir” adlı şeiri ilə Azərbaycan poeziyasına öz möhürünü vuran Abbas Səhhətin çoxşaxəli yaradıcılığına “Əhmədin cəsarəti”, “Şair, muza və şəhərli” poemaları, “Kasıblıq eyib deyil”, “Neft fontanı” komediyaları, Azərbaycan dilinin 3 illik tədrisi üçün dərslik və digər qiymətli əsərlər daxildir. Abbas Səhhət “Ana və bala”, “Ata və oğul”, “Yay”, “Ayı və şir”, “Quşlar” və onlarla başqa təmsil və təbdillərin müəllifidir.

N.Məmmədli