Botanika İnstitutu ilə “AzerGold”un Daşkəsəndə layihəsi

“AzerGold” QSC tərəfindən Elm və Təhsil Nazirliyinin Botanika İnstitutu əməkdaşlarının iştirakı ilə “Daşkəsən rayonunda bitən nadir bitkilərin reintroduksiyası” layihəsi həyata keçirilir. Layihə üzrə “Çovdar” qızıl mədəni ətrafında Azərbaycan Respublikasının “Qırmızı kitabı”na daxil edilmiş bitki növlərinin çoxaldılması icra edilib.

“Yaşıl dünya naminə həmrəylik ili” çərçivəsində təşkil edilən növbəti aksiya zamanı Zəngəzur itburnusu, Qafqaz dağdağanı iriyarpaq kövrək mürdəşər, şabalıdyarpaq palıd və başqa nadir ağac və bitki növlərinin kütləvi əkini həyata keçirilib.

2021-ci ildə başlanan layihə hər ilin oktyabr-noyabr aylarında nadir, nəsli kəsilmək təhlükəsində olan ağac tingi və bitki kollarının tarixən yetişdiyi ərazilərdən biri kimi Daşkəsən rayonunda, “Çovdar” mədəninin ətrafında ayrılmış geniş ərazidə həyata keçirilir.