M.Maqomayev adına Azərbaycan Dövlət Akademik Filarmoniyasında görkəmli pianoçu, pedaqoq, Əməkdar incəsənət xadimi, professor Elmira Səfərovanın (1934–1997) 90 illiyinə həsr olunmuş konsert keçirilib.

Dekabrın 20-də təşkil olunan yubiley konsertinin tamaşaçıları arasında Prezident Administrasiyası Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, mədəniyyət nazirinin müavini Murad Hüseynov, tanınmış mədəniyyət və digər qonaqlar olub.

Konsertdə bədii rəhbər və baş dirijor, Əməkdar artist Fuad İbrahimovun rəhbərliyində Ü.Hacıbəyli adına Azərbaycan Dövlət Simfonik Orkestrinin müşayiəti ilə solistlər –Xalq artisti Fərhad Bədəlbəyli (piano), Xalq artisti Murad Adıgözəlzadə (piano), Əməkdar artistlər Gülşən Ənnağıyeva, Nərgiz Əliyarova, Elnarə Kəbirlinskaya çıxış ediblər.

Proqramda F.Şopenin "Piano və orkestr üçün 1 nömrəli konsert" (e-moll, op.11, I hissə), Y.Bramsın "Piano və orkestr üçün 1 nömrəli konsert" (d-moll op.15, I hissə), V.A.Motsartın "İki piano və orkestr üçün konsert" (es-dur KV. 365, 3 hissədə) və S.Raxmaninovun "İki piano və orkestr üçün 2 nömrəli süita" (op.17, III. Romans və IV. Tarantella) əsərləri səsləndirilib.

Konsert proqramı alqışlarla qarşılanıb.