Şəki şəhər Heydər Əliyev Mərkəzinin “Yaşıl dünya naminə həmrəylik ili” çərçivəsində təşkil etdiyi “Yaşıl dünya üçün” adlı rəsm müsabiqəsinə yekun vurulub. Bir ayadək davam edən müsabiqə rayonun ümumtəhsil məktəblərinin şagirdləri arasında 4 sinif kateqoriyası üzrə keçirilib. Müsabiqənin yekun mərhələsinə 100-dək şagirdin mövzu ilə bağlı rəsm əsəri təqdim olunub. Hər kateqoriya üzrə ilk üç yeri tutan iştirakçılar mükafatlandırılıblar. Şəki şəhər 2 nömrəli Uşaq musiqi məktəbinin müəllim və şagirdlərinin ifasında milli musiqi nömrələri səsləndirilib.

***

Quba-Xaçmaz RMİ-nin təşkilatçılığı ilə Quba rayon MKS Mərkəzi Kitabxanasının Uşaq şöbəsi tərəfindən Quba şəhər 7 saylı körpələr evi-uşaq bağçasında şair Məmməd Aslanın (1939-2015) 85 illiyi ilə əlaqədar ucadan oxu keçirilib. Uşaqlara şairin “Səhəri kim açır” kitabı ucadan oxunub.

***

Qəbələ rayon Mədəniyyət Mərkəzində rayon və kənd yerlərində yaradıcı sənayelərin inkişafına dəstək məqsədilə “Sənət inciləri” adlı sərgi keçirilib. Sərgidə müxtəlif üslublarda əl işləri nümayiş olunub. Bildirilib ki, rayon Mədəniyyət Mərkəzində mütəmadi olaraq keçirilən bu tip sərgilər yaradıcı və mədəniyyət sənayelərinə dəstək məqsədi daşıyır.  Sonda sərginin iştirakçılarına Mədəniyyət Mərkəzi tərəfindən diplomlar təqdim olunub.

***

Saatlı Dövlət Rəsm Qalereyasında Azərbaycan Yazıçılar Birliyinin üzvü, yazıçı Esmira Abbasovanın (Esmira Günəş) şəhidlərə həsr etdiyi “Sönməyən ulduzlar” kitabının təqdimatı keçirilib. Kitabda Saatlı rayonunun Çolpı kəndindən olan Vətən müharibəsi şəhidi Cəlal Bayramov barədə də məlumat yer alıb. Təqdimatda valideynləri də iştirak ediblər. Müəllif kitab haqqında məlumat verib. Məktəblilərin ifasında şeirlər səsləndirilib, Saatlı şəhidlərinə həsr olunmuş sənədli film nümayiş etdirilib.

***

Neftçala rayon Heydər Əliyev Mərkəzinin əməkdaşları 5 saylı körpələr evi-uşaq bağçasının qonağı olub. Görüşdə balacalar üçün maraqlı yarışlar, intellektual oyunlar təşkil edilib. Hər uşaq öz istedad və bacarığını nümayiş etdirib, şeirlər söyləyib, mahnılar oxuyub, rəqs ediblər. Şaxta baba və Qar qız müxtəlif hədiyyələrlə uşaqları sevindirib. Sonda uşaqlar “Ağıllı kirpi” cizgi filmini izləyiblər.

***

Oqtay Kazımi adına Astara şəhər Uşaq musiqi məktəbində “Oqtaylı nəğmələr” adlı tədbir keçirilib. Xalq artisti, bəstəkar Oqtay Kazıminin (1932-2010) anadan olmasının 92-ci ildönümü münasibətilə təşkil olunan tədbir bəstəkarın “Çahargah” fantaziyası” ilə başlayıb. Sonra bəstəkarın həyat və fəaliyyətindən, sənət korifeylərinin ifasında dünyanı gəzən mahnıları haqqında məlumat verilib. Tədbirdə O.Kazıminin müxtəlif janrlı əsərləri məktəbin instrumental ansamblının müşayiəti ilə səsləndirilib.

***

Azərbaycan təsviri sənətinin görkəmli nümayəndəsi, Xalq rəssamı, Dövlət mükafatı laureatı Səttar Bəhlulzadənin (1909–1974) 115 illik yubileyi ilə əlaqədar  Qazax Dövlət Rəsm Qalereyasında rəsm sərgisi təşkil edilib. Sərgidə dərnək üzvlərinin mövzu ilə bağlı rəsmləri nümayiş olunub.

***

Lerik rayon Heydər Əliyev Mərkəzində Dini Qurumlarla İş üzrə Dövlət Komitəsinin Lənkəran regional bölməsi, Lerik Rayon İcra Hakimiyyəti, Lerik rayonu üzrə Təhsil sektoru ilə birgə “Qızların təhsil almasının önəmi: dini qaynaqlar nə deyir?” mövzusunda tədbir təşkil olunub. Çıxışlarda qızların təhsil almasının ümumilikdə cəmiyyət üçün əhəmiyyəti vurğulanıb, dini mətnlərdə də təhsilə dəyər verildiyi diqqətə çatdırılıb. Mövzu ətrafında müzakirələr aparılıb.

Hazırladı: N.Məmmədli