Narıngül
  
   Qaçdım adilikdən
  
   Fəsillər dəyişən ağac şəklidir
   Payıza sevindim, yaza sevindim.
   Gördüm çəkəmmirəm, atdım yükümü
   Bütün havalara oynaya bildim.
  
   Yaxamdan yer tutdu, məni göy çəkdi,
   Uca zirvələrə çatdım, oyandım.
   Sən demə, göy yerin təkrarı imiş,
   Hamının keçdiyi yerdə dayandım.
  
   Qaçdım adamlardan, gücüm çatınca,
   Qaçdım adilikdən, sirrə sığındım.
   Mən coşmuş bir çayam, qurumadım ki,
   Səndən çəkildikcə sözə yığıldım.
  
    * * *
  
   Mələklər diyarından gəlirəm
   qanadlarım yanımda,
   ürəyim
   küçə-küçə bölünüb
   küçələrdə yad adamlar dolaşır
   görən, yad adamlara
   salam versəm olarmı?
   Görən, o yad adamlar
   Məni duyub anlarmı?
  
   mələklər diyarından gəlirəm
   gözlərimdə bir boşluq uzantısı
   ürəyimdə
   səbəbi bilinməyən
   etiraz aksiyası,
   dumanın içində uzaqlaşan adamlar
   Səhər-səhər
   qapıları döyüb dilənən qadın
   üzündən təbəssüm ver mənə,
   ötürüm adamlara.
  
   Mələklər diyarından gəlirəm
   mən yer adamı deyiləm.
  
    * * *
   Üzümdəki işıq çat verəcək
    kölgə düşəcək şəhərə,
    küçəyə, səhərə
   və şəhər can verəcək,
   və küçə can verəcək
   Ürəyimdə adam izdihamı,
   Ürəyimdə sevgi izdihamı
   çıxıb gedəcəyəm
   Çıxıb gedəcəyəm üzü
   qurumağa.
   Sən heç
   ayaq üstə quruyan ağac
   görmüsənmi?
   qadın da ağac kimidir
   içindən quruyur.
   hər səhər
   ümidlər doğacaq üzümə.
   Sənin bir adın da ümiddir
   və hərdən günəş görünəcək
   amma mən qaranlıq düşməmiş
   soyunub atacağam bütün hisslərimi.
   Sən necə?
  
    * * *
   Kəpənək qanadlım,
   canında titrəyiş var,
   gözlərində təlatüm.
   həsrətin göydən düşməyəcək -
   üç alma həsrəti,
   etirafın sevgi.
   bəlkə də, bu sondur,
   bəlkə də, dönüşdür.
   sən uzaq yolların sonundan
   gəlirsən.
   sənin azadlığın, tənhalığındır
   sənin azadlığın yuxularındır.
   Sən dünyanı başqa cür istəmişdin,
   sən dünyamız hüdudsuzdur -
   demişdin.
   anlamadığın adamlar
   sənə dünyanı anlatdılar.
   dünyanın bütün adamları
   hardasa həqiqət gizlənib - dedilər.
   gəz axtar tapacaqsan
  
   kəpənək qanadlım, gözlərin açılır,
   qanadların bərkiyir,
   doğuluşun mübarək!
   pəncərə arxasında toxunmadığın
   çox şey var
   anlayışın mübarək!
  
   Nə vaxtsa qayıtsam...
  
   Daha nə nağıl var, nə də yalan var,
   Nə biri söz deyər sözünün üstə.
   Nə yol var həsrətdən uzanıb gedə,
   Əlini qoyasan gözünün üstə.
  
   Küləyin ağzında payız nəfəsi,
   Səpilir havaya quş lələkləri.
   İntihar rəqsinə oynayır hər şey,
   Sinəsinə çəkir yer çiçəkləri.
  
   Dönərək buluda çıxıb gedirəm,
   Bir daha çıxmaram yerdə qarşına.
   Nə vaxtsa qayıtsam, yağış şəklində,
   Çevrilib torpağa məni qarşıla.
  
    * * *
   Üzümə açılan gecə,
   Ürəyimi açarmı?
   Səhər doğacaq günəş,
   Məni alıb qaçarmı?
  
   Keçməyə qorxduğum ömür,
   Gəlib məndən keçərmi?
   Düyünlənmiş ovcumdan,
   Tənhalığım düşərmi?
  
   Dünya adlı sualın
   Düzgün cavabı varmı?
   Sevinc bu qədər yüngül,
   Dərd bu qədər ağırmı?