Kitab sərgisində Ukrayna şairi Taras Şevçenkonun yaradıcılığına həsr olunmuş tədbir keçirildi
   
   Sentyabrın 28-də II Bakı Beynəlxalq Kitab Sərgi-Yarmarkasında görkəmli Ukrayna şairi Taras Şevçenkonun yaradıcılığına həsr olunmuş “Sənət ustadı, həqiqət carçısı” adlı tədbir keçirildi.
   
   Tədbiri Mədəniyyət və Turizm Nazirliyi Nəşriyyat, reklamın təşkili və informasiya şöbəsinin Nəşriyyat sektorunun müdiri, şair Çingiz Əlioğlu açaraq görkəmli ədibin yaradıcılığından danışdı.
   Sonra tədbiri aparmaq üçün söz şair, tərcüməçi Səyavuş Məmmədzadəyə verildi. O, Azərbaycanla Ukrayna arasındakı qədim və yaxın əlaqələrdən danışdı. Azərbaycan ədəbiyyatında ukraynalı obrazının özünəməxsus yer tutduğunu deyən şair hələ Nizami Gəncəvinin yaradıcılığında slavyan gözəli obrazının olduğunu xatırlatdı. Ukraynanın Azərbaycandakı səfiri Aleksandr Mişşenko Azərbaycanda Ukrayna mədəniyyətinə göstərilən diqqəti, Bakı Slavyan Universitetində Ukrayna mədəniyyət mərkəzinin fəaliyyət göstərməsini, Bakıda Taras Şevçenkonun abidəsinin ucaldılmasını yüksək qiymətləndirdi. Səfir Ukraynada Azərbaycan şairlərinin kitablarının nəşr olunduğunu, Nizami Gəncəvinin “Leyli və Məcnun” əsərinin Ukrayna dilinə tərcümə edildiyini söylədi.
   T.Şevçenkonun əsərlərini Azərbaycan dilinə tərcümə edən şair Abbas Abdulla şairin yaradıcılığı barədə ətraflı məlumat verdi. Onun şeirlərindən bir parçanı həm Ukrayna, həm də Azərbaycan dilində söylədi. Bildirdi ki, 2014-cü ildə Taras Şevçenkonun 200 illik yubileyi Azərbaycanda da qeyd olunacaq.
   Şair-təcüməçilər Ayaz Vəfalı, Səlim Babullaoğlu və Ağacəfər Həsənli də Ukrayna ədibinin həyat və yaradıcılıq yolundan danışdılar. Sonra Bakı Slavyan Universitetinin ukraynaşünas tələbələri T.Şevçenkonun sözlərinə yazılmış musiqi parçaları ifa etdilər.
   
   Reyhan