Xəbər verildiyi kimi, Danimarka paytaxtında keçirilən “Eurovision-2014” mahnı müsabiqəsində Azərbaycanın təmsilçisi Dilarə Kazımova mayın 6-da ilk yarımfinalda uğurla çıxış edərək finala vəsiqə qazanıb. Təmsilçimiz mayın 10-da Kopenhagendəki “B and V” arenada “Eurovision-2014” mahnı müsabiqəsinin finalının birinci hissəsində səhnəyə çıxacaq. Final mərhələsində 25 ölkə təmsilçisi çıxış edəcək.
“Qələbə qazanmaq üçün əlimdən gələni əsirgəməyəcəyəm”, - deyə Dilarə Kazımova jurnalistlərə bildirib. Təmsilçimizin “Start a Fire” mahnısında adi qığılcımın böyük bir alov yarada biləcəyindən söhbət açılır. Dilarə Kazımovanın səhnə performansının quruluşçu rejissoru isveçli rejissor və xoreoqraf Osa Enqman və yapon əsilli polşalı xoreoqraf Petr Torazava Giro, mahnının bəstəkarı Stefan Örndür.