![](/img/news/700x420/18134.jpg)
İyulun 30-da Qəbələ şəhərində ənənəvi musiqi festivalı start götürəcək.
Heydər Əliyev Fondunun mühüm mədəniyyət layihələrindən olan Qəbələ Beynəlxalq Musiqi Festivalı 2009-cu ildən keçirilir və ötən müddətdə bir çox məşhur ifaçı və kollektivlərin iştirakı sayəsində dünya musiqi festivalları xəritəsində özünə layiqli yer qazanıb.
Avqustun 5-dək davam edəcək VIII Qəbələ Beynəlxalq Musiqi Festivalında Azərbaycan, İspaniya, Avstriya, Yunanıstan, Ukrayna, İsrail, Kubadan musiqi qrupları, dirijor və solistlər iştirak edəcəklər. Konsertlər Heydər Əliyev Konqres Mərkəzinin böyük zalında və açıq havada qurulan xüsusi səhnədə keçiriləcək.
iyulun 30-da Festivalın ilk konsertində Tofiq Şıxıyev (piano), Vurğun Vəkilov (piano), Nicat Məmmədov (fleyta), Gülər Ağayeva (piano), Ceyhun Allahverdiyev (piano), vokalçılar Taleh Yəhyayev və Aytən Şıxəlizadə çıxış edəcəklər.
Axşam isə festivalın açılış mərasimində Xalq artisti Rauf Abdullayevin dirijorluğu ilə Üzeyir Hacıbəyli adına Azərbaycan Dövlət Simfonik Orkestri çıxış edəcək. İyulun 31-də Vyana Akademik Orkestrinin (bədii rəhbər - Martin Haselblok) çıxışı və İspaniyanın “Suite Espanola” şirkətinin təqdimatında flamenko konserti nəzərdə tutulub.
Avqustun 1-də təqdim ediləcək konsertdə Fərhad Bədəlbəyli (fortepiano), Murad Adıgözəlzadə (fortepiano), Janna Qandelman (skripka), Dmitri Yablonski (violonçel) çıxış edəcəklər. Yunanıstanın folklor kvarteti isə azərbaycanlı xanəndələr Güllü Muradova, İlkin Əhmədov, habelə Sahib Paşazadə (tar), Toğrul Əsədullayev (kamança), Emin Cəbrayılov (nağara), Əli Əliməmmədov (balaban) və Çinarə Heydərova (qanun) ilə eyni səhnəni bölüşəcək.
Festivalın sonrakı günlərində Kubanın “Gənc klassiklər” ansamblı, “Kiyev virtuozları” orkestri musiqisevərlər qarşısına çıxacaq.
Musiqi bayramına avqustun 5-də “Kiyev virtuozları” orkestrinin konserti ilə yekun vurulacaq.
Qeyd edək ki, VIII Qəbələ Beynəlxalq Musiqi Festivalı çərçivəsində avqustun 2-dən 5-dək beynəlxalq fortepiano müsabiqəsi də keçiriləcək.