Sentyabrın 21-də Üzeyir Hacıbəyli VIII Beynəlxalq Musiqi Festivalı çərçivəsində növbəti konsert Kamera və Orqan Musiqisi Zalında keçirildi. Gecənin qonağı tanınmış orqan ifaçısı Rəna İsmayılova idi. Zalın musiqisevərlərlə dolması konsertə olan maraqdan xəbər verirdi.

Əvvəlcə sənətşünaslıq üzrə fəlsəfə doktoru, musiqişünas Lalə Hüseynova çıxış edərək musiqi axşamı barədə ürək sözlərini bölüşdü. Qeyd etdi ki, respublikanın Əməkdar artisti Rəna İsmayılova on ildən bəri Almaniyanın Köln şəhərində yaşayıb fəaliyyət göstərir.
Bildirildi ki, R.İsmayılova 1974-cü ildə Ü.Hacıbəyli adına Azərbaycan Dövlət Konservatoriyasını fortepiano və orqan ixtisasları üzrə bitirib. 1983-1986-cı illərdə P.İ.Çaykovski adına Moskva Dövlət Konservatoriyasının nəzdində assistent-stajor kimi orqan ixtisası üzrə professor L.İ.Royzmanın sinfində təhsilini davam etdirib. Bakı, Moskva, Riqa, Minsk, Berlin, Köln, Düsseldorf, Altenberq və s. şəhərlərdə çıxış edib. 2001-ci ildə onun “Azərbaycan bəstəkarlarının orqan musiqisi” adlı kitabı nəşr olunub.
Konsertdə Rəna İsmayılova Q.Qarayevin “Don Kixot” simfonik qravürlərindən iki fraqment, V.Adıgözəlovun “Muğam-fantaziya”, A.Əlizadənin “Muğam sədaları”, S.İbrahimovanın “Poema-ithaf”, N.Əliverdibəyovun “Bayatı-Şiraz”, F.Əlizadənin “Fantaziya”, eləcə də “La transfiguration du Notre Seigneur” (O.Messian), “Şotland melodiyalarına iki transkripsiya” (E.Lemare), “Chat du matn” (A.Guilmant), “Poslidio in memoriam Gara Garayev” (C.Abbasov), “Pomp and Circumstance” (E.Edqar), “Ave Maria” (F.Bədəlbəyli) əsərlərini səsləndirdi.
İfaçını vokalçı solistlər Fəridə Məmmədova (soprano), Səbinə Əsədova (mezzo-soprano) və Taleh Yahyayev (bariton) müşayiət edirdilər.
Konsert proqramı musiqisevərlərin alqışları ilə qarşılandı.

S.Qaliboğlu