- 15-07-2009
- 1280
Fransanın Sen-Moris-de-Reman komunnasının (Fransada ən aşağı inzibati-ərazi vahidi) administrasiyası məşhur yazıçı Antuan de Sent-Ekzüperinin yaşadığı qəsri Liondan satın alıb. Bu barədə «France Presse» agentliyi məlumat yayıb. Lion hakimiyyət orqanlarının məlumatına görə, alqı-satqı 950 min avroya başa gəlib. Gözlənildiyinə görə, qəsrdə yazıçının həyat və yaradıcılığına həsr olunan muzey açılacaq. Hələlik muzeyin nə zaman açılacağı ilə bağlı məlumat verilmir.Antuan de Sent-Ekzüperinin ailəsi qəsri 1932-ci ildə Lion məktəb müəssisəsinə satıb. 1997-ci ildə qəsri keçmiş nazir Şarl Miyona yaxın strukturlar satın alıblar. Amma bu alqı-satqı 2 dəfə - 2005 və 2007-ci illərdə məhkəmənin qərarı ilə ləğv edilib.
Antuan de Sent-Ekzüperi 1900-cu ildə doğulub. Onun ən məşhur əsəri «Balaca şahzadə» sayılır. Yazıçı 1944-cü ildə kəşfiyyat uçuşu zamanı itkin düşüb.
Onun içində uçduğu «Lockheed Lightning P-38» təyyarəsinin qalıqları ancaq 60 il sonra tapılıb. Təyyarəni 2004-cü ildə Aralıq dənizinin dibində aşkar ediblər.
