- 20-07-2012
- 882
Yayın bu qızmar günlərində teatrlar da mövsümü başa vuraraq tətilə çıxdılar. Mövsüm boyu bir-birindən maraqlı tamaşalar təqdim edən sənət ocaqlarımız təxminən iki aylıq istirahətdən sonra yenidən qapılarını teatrsevərlərin üzünə açacaq.Dövlət Opera və Balet Teatrı mövsümə hələ ötən ayın 27-də yekun vurub. Teatrın səhnəsində oynanılan son əsər P.Maskaninin “Kənd namusu” operası olub. Teatrın simfonik orkestri avqustun 8-dən 13-dək Almaniyada keçiriləcək “Opera sənəti” festivalında iştirak etmək üçün qastrol səfərinə hazırlaşır.
Akademik Milli Dram Teatrı mövsümə görkəmli yazıçı-dramaturq İlyas Əfəndiyevin “Hökmdar və qızı” əsəri əsasında Mərahim Fərzəlibəyovun quruluş verdiyi “Qarabağnamə” tamaşası ilə yekun vurdu. Teatrın mətbuat xidmətinin məlumatına əsasən, yaradıcı heyət yeni mövsümə də bu əsərlə başlayacaq.
Şuşa Dövlət Musiqili Dram Teatrı mövsümü M.F.Axundzadənin “Sərgüzəşti-vəziri-xani-Lənkəran” komediyası ilə başa vuraraq istirahətə yollanıb. Teatr yeni mövsümü də eyni əsərlə açmağı planlaşdırır.
Dövlət Yuğ Teatrı mövsümü argentinalı yazıçı Xorxe Luis Borxesin “Tabu” əsəri ilə yekunlaşdırdı. Tamaşanın rejissoru Ruslan Şöhrətoğludur.
Bakı Uşaq Teatrı da mövsümə yekun vurub. Kollektiv 1 saylı Cəzaçəkmə Müəssisəsində “Qeyri-adi məhkəmə” adlı tamaşa ilə çıxış edib. Kollektiv bu tamaşanı avqustun 27-də Masallıda, sonra isə Gəncə və Lənkəranda nümayiş etdirməyi nəzərdə tutur.
Musiqili Komediya Teatrı isə mövsümü iyunun sonunda M.F.Axundzadənin “Hekayəti-Molla İbrahimxəlil kimyagər” əsəri əsasında hazırlanmış “Kimyagər” tamaşası ilə yekunlaşdırıb.
Lalə Azəri
