Amerika Birləşmiş Ştatlarının Çikaqo şəhərində bu il 14-cü dəfə təşkil olunan Türk mədəniyyəti festivalı başa çatıb. Şəhərin “Daley” meydanında keçirilən festivalda türk əl sənətkarlığı, mədəniyyəti, musiqisi, incəsənəti və mətbəxinə aid nümunələr sərgilənib.
Çikaqo və ətrafda yaşayan Türkiyə vətəndaşları ilə yanaşı, Azərbaycan və amerikalıların böyük maraq göstərdiyi festivalda minlərlə insan iştirak edib.
Dörd gün davam edən festivalda Türkiyəni təmsil edən “Anadoludan əsintilər” xalq rəqsi ansamblı və “Lama Jamal” musiqi qrupu da hər gün səhnəyə çıxıb. İzmir Təkmilləşmə İnstitutunun hazırladığı qiyafətlərin açıq havada nümayişi də iştirakçıların böyük marağına səbəb olub.
Tədbirdə türk musiqilərindən ibarət konsert proqramları təşkil edilməklə yanaşı, xalq oyunlarından ibarət bir sıra şou kompozisiyalar da nümayiş olunub.
Festivalın təşkil olunmasında məqsəd Türkiyə mədəniyyətini tanıtmaq və təbliğ etməkdən ibarətdir.
Türk mədəniyyəti festivalında çarıq ustası Hüseyn Qopar, oyma sənətkarı Mustafa Toprakkale, ebru sənətkarı Sevim Sürücü, mis ustası Həsən Var, ənənəvi keçə ustası və rəssam Mükerrem Turxan, rəssamlar Dərin Baratka və Tan Taşpolatoğlu da əsərlərini nümayiş etdirib və maraqlananlara iş texnikalarını başa salıblar.