Treninqdə dünya kino sənətindəki yeniliklər, fərdi yaradıcılıq imkanları müzakirə olunacaq
   
   İyulun 13-dən 18-dək Bakıda, C.Cabbarlı adına “Azərbaycanfilm” kinostudiyasının bazasında tanınmış polşalı kinorejissor Kşiştof Zanussi tərəfindən kinorejissorlar üçün ustad dərsləri təşkil ediləcək.
   
    Bu təcrübə mübadiləsi Prezident İlham Əliyevin 4 avqust 2008-ci il tarixli sərəncamı ilə təsdiq edilmiş “Azərbaycan kinosunun 2008-2018-ci illər üzrə inkişafına dair Dövlət Proqramı”na uyğun olaraq həyata keçirilir.
   Ustad dərslərində rejissorlar Elxan Cəfərov, İlqar Safat, Samir Kərimoğlu, Əli İsa Cabbarov, Asif Rüstəmov, Tahir Əliyev, Elçin Musaoğlu, Emin Mirabdullayev və digərləri iştirak edəcəklər.
   İyulun 13-də “Nizami” Kino Mərkəzində polşalı kinorejissor K.Zanussi ilə iştirakçı rejissorlar arasında tanışlıq mərasimi keçiriləcək və bundan sonra ustad dərslərinə start veriləcək.
   Dərslər gündə iki dəfə olmaqla, iyulun 18-dək davam edəcək. Altıgünlük treninqdə praktiki və nəzəri biliklərin təkmilləşdirilməsi istiqamətində dərslər veriləcək. Dünya kino sənətindəki yeniliklər, fərdi yaradıcılıq imkanları müzakirə olunacaq.
   
   Reyhan