Beynəlxalq Muğam Mərkəzinin “Etnik musiqi inciləri” layihəsi çərçivəsində növbəti konsert Mərakeş etnik musiqisinə həsr olunub.
   Aprelin 19-da Mərakeş səfirliyinin dəstəyi ilə reallaşacaq konsertdə Maalem Xoussam Quinia öz qrupu ilə Qnava üslubunda ifa nümayiş etdirəcək. Qnava üslubu Mərakeşin mədəni irsinin əsas istiqamətlərindəndir. Afrika, əsasən də Mərakeş folkloruna aid bu ənənəvi musiqi qitənin qəbilələrinin mətn, mahnı və rəqslərindən ibarət kompozisiyadır.
   Bu musiqi ənənəsini beynəlxalq səviyyəyə “Led Zeppelin” qrupundan məşhur ifaçılar Cimmi Peyc və Robert Plant, bəstəkar Adam Rudolf, caz pianoçusu və bəstəkar Rendi Veston, bas gitaraçı Bill Lasvel çıxarıb. Bu il “İnnov Qnava” qrupu “Qremmi” mükafatının “Ən yaxşı rəqs” nominasiyasına layiq görülüb. Mərakeşin Essauriya şəhərində hər il Qnava Beynəlxalq Musiqi Festivalı keçirilir.