Seçmələr mətnlərin orijinallığı (yazı üslubu, orfoqrafiyası) saxlanılmaqla təqdim edilir. Dövrün mətbu nümunələrinin əldə olunmasında göstərilən köməyə görə Azərbaycan Milli Kitabxanasına təşəkkür edirik.

Poeziyada və mahnılarda komsomolun tərənnümü

Azərbaycan dövlət filarmoniyasının səyyar mühazirə bürosu tərəfindən hazırlanan konsert-mühazirə seriyası “Poeziya və mahnılarda komsomolun tərənnümü” adlanır. Lenin komsomolunun 40 illiyinə həsr edilən bu seriyaya iki mövzu daxil edilmişdir. “İlk komsomolçular” adlanan birinci mövzu vətəndaş müharibəsində gənclərin iştirakını və ilk beşillikləri tikintilərində onların fədakar əməyini əks etdirir. “Fədakar komsomolçular” adlanan ikinci mövzu Böyük Vətən müharibəsi dövrünü və müharibədən sonrakı illəri əhatə edir.

S.M.Kirov adına Mərkəzi mədəniyyət və istirahət parkında “İlk komsomolçular”  mövzusunda birinci konsert olmuşdur. Azərbaycan SSR siyasi və elmi  biliklər yayan cəmiyyətin həqiqi üzvü S.Nevedov toplaşanlara Sovet dövlətinin və komsomolun yaradıldığı ilk günlərdəki hadisələrin bəstəkarlarımızın və şairlərimizin yaradıcılığında əks etdirilməsindən, habelə gənclərin Kommunist partiyasının rəhbərliyi altında cəbhədə və əməkdə göstərmiş olduqları qəhrəmanlıq nümunələrindən danışmışdır. Sonra gənclərin VI Ümumdünya festivalının laureatı – Azərbaycan dövlət filarmoniyasının simli kvarteti və solistləri, habelə Azərbaycan dövlət operasının solistləri və estrada artistləri çıxış  etmişlər. Onlar komsomola və gənclərə həsr olunmuş mahnı və şeirlər ifa etmişlər.

Gənclər Teatrının yeni tamaşası

Bu günlərdə Maksim Qorki adına Gənc Tamaşaçılar Teatrı öz yeni əsərini – qocaman dramaturq Abdulla Şaiq tərəfindən yazılmış “Bir saat xəlifəlik” pyesini göstərmişdir. Bu pyesin əsasını Bağdad xəlifəsi Harun ər Rəşid və onun qardaşı Bəhlul danəndə haqqında ərəb əfsanəsi təşkil edir. Tamaşanın quruluşu Azərbaycan SSR əməkdar incəsənət xadimi  Z.Nemətovundur. Bəhlul Danəndə rolunda Azərbaycan SSR xalq artisti Əliağa Ağayev, Harun ər-Rəşid rolunda artist Yusif Vəliyev çıxış edirlər.

“Kommunist” qəzeti,
10 iyun 1958-ci il

“Sancaq” qəzetində azəri şeirləri

İstanbulda nəşr olunan “Sancaq” qəzetinin 1968-ci il 21 may tarixli nömrəsində Bəxtiyar Vahabzadənin “Mənim anam” və “Olurmuş” şerləri dərc edilmişdir. Şerləri türkcəyə Əhməd Şəmidə çevirmişdir. O, eyni zamanda həmyerlimizin yaradıcılığı barədə qəzetdə məlumat vermişdir.

“Bakı” axşam qəzeti,
10 iyun 1968-ci il

Hazırladı: LALƏ