Özbəkistanın “Zor TV” kanalında Azərbaycanın və SSRİ-nin Xalq artisti Zeynəb Xanlarova haqqında veriliş yayımlanıb.

Proqramda Özbəkistanın mədəniyyət və incəsənət xadimləri, bu ölkənin Xalq artisti, Nəsibə Abdullayeva, Daşkənddəki Heydər Əliyev adına Azərbaycan Mədəniyyət Mərkəzinin nəzdində fəaliyyət göstərən “Azərbaycan qızları” rəqs ansamblının rəhbəri, Azərbaycanın Əməkdar artisti Kövkəb Əliyeva və başqa sənətçilər iştirak ediblər.

Verilişdə qeyd edilib ki, “Mehr gözdə” adlı proqramın müəllifi və aparıcısı Asror Abrorxocayev Bakıda olub və Zeynəb Xanlarova ilə görüşüb. Verilişdə müəllifin Zeynəb Xanlarova ilə müsahibəsi yayımlanıb və sənətkarın Daşkənddəki konsertlərini və unudulmaz mahnılarını əks etdirən kadrlar təqdim olunub. Bildirilib ki, Zeynəb Xanlarova 1980-ci, 1982-ci və 1998-ci illərdə Daşkənddə olub, paytaxtın ən böyük konsert salonunda sənətsevərləri sevindirib.

Verilişdə Azərbaycan şairi Dəmir Gədəbəylinin Zeynəb Xanlarova haqqında Bakıda lentə alınan fikirləri tamaşaçıların diqqətinə çatdırılıb.

Nəsibə Abdullayeva və Kövkəb Əliyeva Zeynəb Xanlarova ilə görüşlərindən danışıb, onun mahnılarını səsləndiriblər.

“Azərbaycan qızları” rəqs ansamblının üzvləri isə milli rəqslərimizi ifa ediblər.