Rüfət Həsənov və Elvin Adıgözəlin “Buqələmun” filminin premyerası festival çərçivəsində gerçəkləşəcək
   
   Avqustun 7-də İsveçrənin Lokarno şəhərində 66-cı beynəlxalq kinofestival başlayacaq. 1946-cı ildən etibarən keçirilən Lokarno festivalı “A” kateqoriyasına (Kann, Berlin, Venesiya festivalları ilə bir sırada) aiddir. Bu kino bayramı filmlərin nümayişlərinin açıq hava altında təşkil olunması kimi özəlliyi ilə fərqlənir.
   
   Avqustun 17-dək davam edəcək 66-cı Lokarno beynəlxalq festivalının müsabiqə proqramında Azərbaycan filmi də yer alıb.
   Gənc rejissorlar Rüfət Həsənov və Elvin Adıgözəlin “Buqələmun” adlı tammetrajlı bədii filmi festivalın rəsmi müsabiqə proqramına daxil edilib və filmin dünya premyerası məhz festival çərçivəsində olacaq. Bu barədə daha ətraflı məlumatı aşağıdakı linkdən almaq olar (http://www.pardolive.ch/en/Pardo-Live/today-at-the-festival/2013/LOC66-Line-up/cineasti-del-presente.html#.Ued52NK8CFs).
   Kinofestivalın müsabiqə proqramına 16 film daxil edilib.
   “Adari Films Productions” şirkətinin məhsulu olan filmin prodüseri İradə Bağırzadədir. Eyni zamanda, “Arizona Productions” (Fransa) və “Vita aktiva” (Rusiya) şirkətləri ilə filmin postprodakşn işləri görülüb.
   Xatırladaq ki, Azərbaycan Prodüserlər Gildiyasının “Geniş baxış” ssenari müsabiqəsinin qalibi olan “Adari Films” şirkətinin altı qısametrajlı novelladan ibarət “Motivlər...” layihəsi çərçivəsində çəkilişlərə start verilib. Layihə üzrə ilk olaraq Rüfət Həsənovun “Bazar günü” filmi lentə alınacaq.
   Layihə Azərbaycan Respublikasının Mədəniyyət və Turizm Nazirliyi və Cəfər Cabbarlı adına “Azərbaycanfilm” kinostudiyası tərəfindən dəstəklənir.