Beynəlxalq Türk Mədəniyyəti və İrsi Fondunun prezidenti Günay Əfəndiyeva Macarıstandan gələn tanınmış diplomat və türkoloq Janos Hovari və məşhur  türkoloq, professor György Hazainin qızı Sesilia Hazai ilə görüşüb.

Fondun fəaliyyəti, gələcək planları barədə məlumat verən Günay Əfəndiyeva türkdilli xalqlarla macarlar arasındakı bağlılıqdan söz açaraq, bu iki xalqın bir çox ortaq adət-ənənə və mədəni dəyərləri bölüşdüyünü bildirib, Macarıstanın müşahidəçi dövlət olaraq Türk Şurasına üzv olmasının əhəmiyyətini qeyd edib.

Professor J.Hovari öz növbəsində Macarıstanda türkologiyanın inkişafı və bu sahədə aparılan bir çox elmi araşdırmalar barədə danışıb.

S.Hazai atasının türkologiya sahəsində gördüyü işlərdən danışaraq türkdilli xalqların artıq ona doğma olduğunu bildirib. O, Beynəlxalq Türk Mədəniyyəti və İrsi Fondu ilə əməkdaşlığa müsbət yanaşdığını və professor G.Hazainin elmi fəaliyyəti müddətində yaratdığı qiymətli kitabxananın qapılarını bu quruma açmağa hazır olduğunu deyib.