İsrailin Təl-Əviv şəhərində “Eurovision 2019” mahnı müsabiqəsində Azərbaycanı təmsil edəcək müğənni Çingiz Mustafayevin beş bek-vokalçısı olacaq.

Pernille Leeloo bu il Danimarkanın milli seçimləri olan “Dansk Melodi Grand Prix”ə qatılıb. Digər bek-vokalçı Sara Linnea 2012-ci ildə “Melodifestivalen”in finalına qədər yüksəlib. Peter Simpson isə “Eurovision 2018”də Avstriya təmsilçisi ilə birgə çalışıb. İfaçı və bəstəkarlar Patrik Jean və Cedrik Hammar Azərbaycan təmsilçisinin oxuyacağı “Truth” (“Həqiqət”) mahnısına həyat verməyə və onu insanlarla bölüşməyə kömək edəcəklər.

“Mən çox xoşbəxtəm ki, bu cür istedadlı və peşəkar insanlar Təl-Əvivdəki çıxışım üçün bizim komandaya qoşulublar. Musiqi prodüserimiz İsa Məlikov və ifaçılıq müəllimi Aleks Panayi, eləcə də “Truth” mahnısının müəllifi Borislav Milanovla birlikdə biz bir çox ifaçıların profilini nəzərdən keçirdik ki, komandamıza qoşulacaq şəxsləri seçək. Əminik ki, komandamıza öz şəxsi toxunuşlarını gətirəcək və çıxışımızı daha rəngarəng edəcək səsləri seçmişik. İlk məşqimiz çox əla keçib və komandamızda çox gözəl harmoniya var”, - deyə Çingiz Mustafayev bek-vokalçıları haqqında fikirlərini bölüşüb.

Qeyd edək ki, Azərbaycan təmsilçisi mayın 16-da “Eurovision 2019” mahnı müsabiqəsinin ikinci yarımfinalında 18-ci nömrə altında səhnəyə çıxacaq.