Mədəniyyət Nazirliyinin Kinematoqrafiya şöbəsinin və Bakı Şəhər Mədəniyyət Baş İdarəsinin birgə təşkilatçılığı ilə müstəqilliyimizin bərpası istiqamətində mühüm səhifə olan 20 Yanvar faciəsinin 30-cu ildönümünə həsr olunmuş “Vətənpərvərlik kinosu həftəsi” keçirilir.

Yanvarın 17-dək keçiriləcək kino həftəsi çərçivəsində Vətən yolunda canlarını fəda edən Azərbaycanın Milli Qəhrəmanlarına və onların döyüş yoluna həsr edilmiş filmlər göstərilir,  yaradıcı heyətlə görüş keçirilir.

Üçüncü ildir həyata keçirilən bu layihənin əsas məqsədi əhali arasında vətənpərvərlik ruhunu gücləndirmək, torpaqlarımız uğrunda döyüşlərdə igidlik nümayiş etdirən Vətən övladlarını gənc nəslə tanıtmaq, Qarabağ müharibəsinin qəhrəmanlıq səhifələrini əks etdirməkdir.

Binəqədi Mərkəzi Mədəniyyət evində Azərbaycanın Milli Qəhrəmanı Şükür Həmidova həsr olunmuş “Aprel yüksəkliyi” filmi (rejissor Zamin Məmmədov), Müşfiqabad qəsəbə Mədəniyyət evində Milli Qəhrəman Vüqar Hüseynov haqqında “Nakam tale” filmi (rejissor Taleh İsmayılov), Nardaran qəsəbə Mədəniyyət mərkəzində Milli Qəhrəmanı Hidayət Rüstəmova həsr olunmuş “Mirpaşa” filmi (rejissor Emin Əfəndiyev) nümayiş olunub.

Film nümayişləri dövlət himninin səslənməsi ilə başlanıb, ölkəmizin ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.

“Vətənpərvərlik kinosu həftəsi” çərçivəsində təqdim edilən filmlərin nümayişi Bakı şəhəri və ətraf qəsəbələrdə yerləşən müxtəlif mədəniyyət müəssisələrində (giriş sərbəstdir) davam edir.